Nuus 12:00

NUUSFLITS NUUSAGENTSKAP 17 November 12 nm

Goeiemiddag. Ek is……..

In die bulletin:

# Honderde SA Jode bepleit ‘n wapenstilstand in Gaza
# Die Departement van Basiese Onderwys sê geen matriekvraestelle het uitgelek nie
# En, rugby: Bulle en Edinburgh begin die naweek se VRK-aksie in die Skotse hoofstad

# Die aantal Suid-Afrikaanse Jode wat ‘n brief onderteken het om te pleit vir ‘n wapenstilstand in Gaza, is byna 600 – insluitend ‘n paar vooraanstaande figure in die gemeenskap. Hulle sluit in Nedlac se uitvoerende direkteur, Lisa Seftel, die gevierde kunstenaar William Kentridge, die akademikus Anton Harber en die regsgeleerde Jonathan Berger. Die ondertekenaars, wat hulself as ‘n uiteenlopende groep Suid-Afrikaanse Jode beskryf, sê hulle is ontsteld oor die situasie wat in Israel en Palestina ontvou. TimesLIVE berig hulle sê een van die kernoortuigings van Judaïsme is die heiligdom van mense se lewens en die plig om dit te bewaar.

# Die Departement van Basiese Onderwys het vals gerugte op sosiale media veroordeel, dat sommige matriekvraestelle uitgelek het.  Altesaam 136 van die 231 vraestelle is reeds sonder voorval geskryf. Die departement se woordvoerder, Elijah Mhlanga, sê die vals plasings op sosiale media is misleidend en wil onnodige verwarring en paniek veroorsaak:

Speel klankgreep: ENG ElijahonExamsPapers

# Sasol het Simon Baloyi as sy nuwe uitvoerende hoof aangestel en hy sal in April volgende jaar die pos oorneem. Hy volg Fleetwood Grobler op wat tot 31 Desember volgende jaar as uitvoerende raadgewer by die chemiese en energiemaatskappy sal aanbly om die oorgang glad te laat verloop. Sasol sê hy glo Baloyi se strategiese ingesteldheid, uitstekende leierskapsvaardighede, tegniese en sakevernuf en grondige operasionele ervaring maak hom die ideale persoon om die pos te beklee. Sasol is op die Johannesburgse Aandelebeurs vir 146,8-miljard-rand gewaardeer.

# Rugby: Die Bulle en Edinburgh skop vanaand die naweek se Verenigde Rugbykampioenskaps-aksie in die Skotse hoofstad af. Terselfdertyd kom die Leeus teen die Ierse span Ulster te staan. Môre verwelkom die Haaie nog ‘n Ierse stpan, Connacht, in Durban, terwyl die Stormers ‘n weg-wedstryd teen Munster in Ierland het. Die Bulle is tans boaan die punteleer na drie oorwinnings uit vier wedstryde. Die Stormers is agste na twee oorwinnings en twee nederlae. Die Leeus is twaalfde en die Haaie in die 16de en laaste plek.

# Die finansiële aanwysers: Die rand verhandel teen 18-rand-41-sent teen die dollar, 19-rand-94-sent teen die euro en 22-rand-79-sent teen die pond. Bitcoin verhandel teen 36-duisend-257-dollar-90-sent. Die prys van goud is een-duisend-985-dollar-35-sent per fynons en die prys van Brent ruolie 77-dollar-51-sent per vat.

# Ten slotte: Die Suid-Afrikaanse Weerdiens sê die verhoogde waarskynlikheid van buitengewone weergebeurtenisse is heel waarskynlik die gevolg van klimaatsverandering. Volgens die bestuurder van Ramprisiko-vermindering, Tshepho Ngobeni, kan hierdie week se geïsoleerde voorvalle egter nie regstreeks aan klimaatsverandering toegeskryf word nie. Ngobeni sê dit is hartseer om te sien hoe mense verliese ly nadat ‘n donderstorm handuit geruk het en ‘n haelstorm in Gauteng en ‘n tornado in die Lekwa Plaaslike Munisipaliteit in Mpumalanga ontketen het:

Speel klankgreep: ENG NgobeniOnSevereWeather

Bly ingeskakel vir meer nuus……………….