Nuus 12:00

BULLETIN 27 Augustus 12 nm

Goeiemiddag. Ek is……..

In die bulletin:

# Die Instituut vir Rasseverhoudinge sê Suid-Afrika het ‘n gulde geleentheid om sy verkiesingstelsel te hersien
# Katolieke en Griekse kerklui bly in Gaza-stad aan ondanks die Israelse inval
# En Taylor Swift and Travis Kelce is verloof

# Die Instituut vir Rasseverhoudinge sê Suid-Afrika se huidige verkiesingstelsel slaag nie in sy doel nie. Die Verkiesingspaneel vir Hervorming en Raadpleging doen ‘n omvattende hersiening van die stelsel en moet einde volgende maand aanbevelings aan die Parlement voorlê. Marius Roodt van die instituut sê die land het ‘n verkiesingstelsel nodig wat proporsioneel, regverdig en toerekenbaar is:

# Die DA sê Sassa kan nie langer armes en kwesbares onwaardig behandel terwyl die agentskap eintlik maatskaplike beskerming moet bied nie. ‘n Groep pensioentrekkers en hulle ondersteuners het gister na die Parlement opgeruk oor hulle probleme met Sassa. Alexandra Abrahams van die DA sê hulle wil die pensioentrekkers se griewe oordra aan die minister van Maatskaplike Ontwikkeling, Nokuzola Tolashe, Sassa se uitvoerende hoof, Themba Matlou, en die Parlement:

Nuus uit die buiteland:

# Katolieke en Grieks-Ortodokse priesters en nonne sal in Gaza-stad aanbly ondanks Israel se plan om die stad militêr oor te neem. Die godsdiens-gemeenskappe het in ‘n gesamentlike verklaring gesê ontruimingsbevele is reeds vir verskeie woonbuurte in Gaza-stad uitgereik. Honderde ontheemdes het sedert die uitbreek van die oorlog in die Grieks-Ortodokse kamp van Sint Porfirius en die Katolieke Heilige Familie-kamp begin woon, insluitende kinders en persone met spesiale behoeftes. Israelse dwaalskote het die Heilige Familiekerk verlede maand getref en drie mense is dood en tien gewond.

# Atletiek: Die wêreld se beste atlete kom vandag in Zurich, Switserland, byeen vir die laaste Diamantliga-byeenkoms. Ses Suid-Afrikaners neem deel aan die tweedaagse geleentheid. Die naellopers Akani Simbine, Shaun Maswanganyi en Bayanda Walaza gaan aan die 100-meter deelneem. Die wêreld se binnenshuise kampioen, Prudence Sekgodiso, neem deel aan die 800-meter, Zenéy van der Walt aan die 400-meter-hekkies en die Olimpiese silwermedalje-wenner Jo-Ané van Dyk aan die spiesgooi. Die internasionale sterre sluit in die Amerikaanse naelloper Noah Lyles en die Sweeds-Amerikaanse wêreldrekordhouer in paalspring, Armand Duplantis.

# Die finansiële aanwysers: Die rand verhandel teen 17-rand-77-sent teen die dollar, 20-rand-54-sent teen die euro en 23-rand-81-sent teen die pond. Bitcoin verhandel teen 110-duisend-579-dollar. Die prys van goud is drie-duisend-384-dollar-1-sent per fynons en die prys van Brent-ruolie 66-dollar-51-sent per vat.

# En ten slotte: Die veertienmalige Grammy-wenner Taylor Swift en die driemalige Super Bowl-kampioen Travis Kelce het verloof geraak sowat twee jaar nadat hulle hul verhouding aangekondig het. Die paartjie skryf in ‘n gesamentlike Instagram-plasing “Julle Engels-onderwyser en liggaamsoefening-onderwyser gaan trou”. Die plasing het meer as 24-miljoen duimpies gekry. Die aankondiging volg net dae nadat Swift ‘n seldsame blik op haar verhouding met Kelce gegee het op sy potgooi New Heights, wat hy saam met sy broer Jason aanbied.

Bly ingeskakel vir meer nuus……………….