Nuus 12:00

BULLETIN NUUSAGENTSKAP 10 Desember 12 nm

Goeiemiddag. Ek is……..

In die bulletin:

# Die regering vra spazawinkeleienaars om voor spertyd te registreer of die gevolge te dra
# Krieket: Die Proteas en Pakistan speel vanaand in die eerste T20 in Durban
# En, Mohammad en Olivia was die gewildste name wat Engelse en Walliese ouers hulle babas in 2023 gegee het

# Die regering vra alle spazawinkeleienaars en voedselhanteringsondernemings om hulle ondernemings by hulle plaaslike owerhede te registreer voor Vrydag se spertyd. Dit volg nadat die Departement van Samewerkende Regering en Tradisionele Sake ‘n nasionale ramp afgekondig het na ‘n toename in voedselvergiftingsgevalle wat met spazawinkels verbind word. Meer as 20 kinders is dood. Die regering se woordvoerder, Sithembile Mazaleni, sê as eienaars nie betyds registreer nie, sal hulle die gevolge van onwettige sakebedrywighede moet dra:

# Die Grensbestuursowerheid sê ‘n Suid-Afrikaanse taxibestuurder is op die Beitbrug-grenspos in Musina, Limpopo, aangekeer toe hy 25 ongedokumenteerde buitelandse burgers wou insmokkel. Twintig kinders tussen die ouderdomme van vyf en 14, wat onwettig onder gevaarlike en onmenslike omstandighede vervoer is, was deel van die groep. Die owerheid se waarnemende kommissaris, Jane Thupana, sê die bestuurder is aangekla en word tans aangehou:

# Die Kaapstadse Openbare Noodkommunikasiesentrum het die naweek twee-duisend-en-25 voorvalle hanteer. Die sentrum sê hierdie styging het gevolg op geraas en mediese noodgevalle. Klagtes oor geraas het tot 307 gestyg vanaf 215 die vorige naweek en daar was 511 mediese gevalle, 138 aanrandings en 81 voertuigverwante voorvalle. Die Kaapstadse Verkeersdienste het ook 30 motoriste in hegtenis geneem en meer as 37-duisend oortredings is verwerk. Die owerhede het inwoners versoek om verantwoordelik fees te vier.

# Krieket: Suid-Afrika en Pakistan speel vanaand in Durban in die eerste van drie T20’s. Heinrich Klaasen sal die Proteas aanvoer in die afwesigheid van Aiden Markram, wat ‘n blaaskans geniet saam met Marco Jansen, Keshav Maharaj, Kagiso Rabada en Tristan Stubbs, wat in die pas-afgelope toetsreeks teen Sri Lanka gespeel het. Die tweede wedstryd vind Vrydag in Centurion plaas en die laaste een die volgende dag in Johannesburg. Dit word gevolg deur drie eendagwedstryde en twee toetse. 

# Die finansiële aanwysers: Die rand verhandel teen 17-rand-86-sent teen die dollar, 18-rand-83-sent teen die euro en 22-rand-79-sent teen die pond. Bitcoin verhandel teen 97-duisend-23-dollar. Die prys van goud is twee-duisend-662-dollar-49-sent per fynons en die prys van Brent-ruolie 71-dollar-88-sent per vat.

# Om mee af te sluit: Mohammad en Olivia was die gewildste name wat Engelse en Walliese ouers hulle babas verlede jaar gegee het. Mohammad het Noah onttroon, wat in 2022 nommer een was, en Olivia het haar eerste plek behou. Brittanje se Kantoor vir Nasionale Statistiek sê ‘n geraamde vier-duisend-661 seuntjies is in 2023 Mohammad gedoop, gevolg deur Noah, Oliver, George, Leo, Arthur, Luca, Theodore, Oscar en Henry. Amelia was die tweede gewildste meisienaam, gevolg deur Isla, Lily, Freya, Ava, Ivy, Florence, Willow en Isabella.

Bly ingeskakel vir meer nuus……………….