Nuus 12:00

BULLETIN NUUSAGENTSKAP 29 November 12 nm

Goeiemiddag. Ek is……..

In die bulletin:

# Tweepot-onttrekkings kan hierdie Swart Vrydag verkope beïnvloed
# Rusland skiet 47 aanvalshommeltuie uit Oekraïne af
# En, krieket: Harry Brook se honderdtal help Engeland in die eerste toets teen Nieu-Seeland

# Standard Bank sê dit sal interessant wees om te sien hoe die tweepot-onttrekkings vanjaar se Swart Vrydag beïnvloed. Die krediethoof, Tumelo Ramugondo, het aan die SABC gesê die moontlikheid bestaan dat mense meer bestee, maar slegs op noodsaaklike artikels. Hy voeg by dat rentekoersverlagings ook koopkrag verbeter, maar dit sal ‘n tydjie duur voor die gevolge sigbaar word:

# Gauteng se beplande nuwe lughawe in die Sedibeng-distrik sal verbindingsvermoë bevorder, werksgeleenthede skep, en plaaslike en internasionale beleggers lok. Dit is deel van ‘n infrastruktuurbelegging van 200-miljard-rand in Sedibeng as ‘n ekonomiese spilpunt. Die LUR vir Finansies, Lebogang Maile, sê die lughawe is deel van ‘n plan wat die uitbreiding van die Gautrein insluit, en ‘n hoëspoed-spoorverbinding van Gauteng na Limpopo. Die projek sal na verwagting in 2026 begin.

# Action Society hou toesig oor die saak van ‘n 14-jarige meisie wat in Oktober by Kapteinsklipstasie in Mitchells Plain, Kaapstad, deur vyf seuns verkrag is. Die seuns, van ses- tot 17-jaar-oud, het die voorval afgeneem en toe versprei. Kaylynn Palm van Action Society sê drie seuns is in hegtenis geneem en hulle volgende hofverskyning is volgende week:

# Rusland sê hy het 47 aanvalshommeltuie afgeskiet wat Oekraïne oornag gestuur het. Dit was hoofsaaklik op die Rostov-grensgebied gemik waar ŉ groot brand op ŉ nywerheidsperseel uitgebreek het. Die konflik wat al byna drie jaar duur, het die afgelope dae verskerp en albei kante gebruik nuwe wapens om die oorhand te probeer kry voordat die verkose Amerikaanse president, Donald Trump, in Januarie aan bewind kom. Plaaslike media berig die aanval het ŉ reuse-brand by ŉ brandstof-depot veroorsaak.

# Krieket: Harry Brook se sewende toets-honderdtal het Engeland gered en hulle het die tweede dag van die eerste toets teen Nieu-Seeland in Christchurch afgesluit op 319 vir vyf. Brook en Ollie Pope het ŉ vennootskap van 151 om die vyfde paaltjie aangeteken nadat Engeland gesukkel het op 71 vir vier na Nieu-Seeland se 348. Joe Root is in sy 150ste toets uit vir ŉ nulletjie. Brook, onoorwonne op 132, gaan môre probeer voortbou op sy vennootskap van 97-lopies met kaptein Ben Stokes. Engeland is tans 29-lopies agter.

# En die finansiële aanwysers: Die rand verhandel teen 18-rand-5-sent teen die dollar, 19-rand-7-sent teen die euro en 22-rand-92-sent teen die pond. Bitcoin verhandel teen 95-duisend-806-dollar. Die prys van goud is twee-duisend-657-dollar-6-sent per fynons en die prys van Brent-ruolie 72-dollar-47-sent per vat.

Bly ingeskakel vir meer nuus……………….