Nuus 12:00

BULLETIN NUUSAGENTSKAP 27 November 12 nm

Goeiemiddag. Ek is……..

In die bulletin:

# Byna 100 ongedokumenteerde kinders is aangekeer in die mynoperasie in Noordwes
# Duitse leiers vermoed die dodelike DHL-vliegongeluk in Litaue was dalk sabotasie
# En Olimpiese Spele: Indië stel ook belang in ‘n aanbod vir 2036 se Spele

# Die Departement van Maatskaplike Ontwikkeling in Noordwes sê hy hanteer die aanhouding van 96 ongedokumenteerde kinders wat betrokke is by onwettige mynbedrywighede in Khuma, Stilfontein. Die kinders kom vermoedelik hoofsaaklik van Mosambiek, Namibië, Zimbabwe en Lesotho. Die departement se woordvoerder, Bathembu Futshane, sê hulle voldoen aan die kinders se basiese behoeftes terwyl hulle wag dat die kwessie ingevolge die Wet op Kindergeregtigheid hanteer word:

# Die Verkiesinghervormings-raadplegingspaneel wat die Nasionale Vergadering aangestel het, het meer as 350 voorleggings ontvang oor moontlike veranderings aan Suid-Afrika se kiesstelsel. Openbare insette het die behoefte uitgelig aan aanspreeklikheid, met talle wat voorspraak maak vir kleiner kiesafdelings, ‘n gemengde stelsel of die behoud van die huidige stelsel. Albertus Schoeman van die paneel vra nog skakeling met die publiek in die volgende fase van die raadplegingsproses:

# Duitse leiers het die moontlikheid genoem dat sabotasie of hibriede oorlogvoering dalk gelei het tot Maandag se neerstorting van ‘n DHL-vragvliegtuig in Litaue. Die vliegtuig was onderweg van Duitsland na die Vilnius-lughawe toe dit neergestort en ‘n huis getref het. Die Duitse kanselier, Olaf Scholz, het vroeër gesê talle vorms van hibriede oorlogvoering word in die land gewaar en die ongeluk moet deeglik ondersoek word. ‘n Bemanningslid is dood terwyl die vlieënier en nog twee insittendes oorleef het, saam met 12 mense wat uit die huis ontruim is.

# Olimpiese Spele: Indië stel ook daarin belang om die Olimpiese Spele in 2036 aan te bied. Dit volg na die nuus dat ‘n uitvoerbaarheidstudie onder leiding van die Internasionale Olimpiese Komitee sal bepaal of Suid-Afrika gereed is om ʼn bod voor te lê. Die president van Wêreldatletiek, Sebastian Coe, wat ʼn kandidaat is om president te word van die IOK, sê hy is verheug oor Indië se aankondiging. Hy waarsku die land egter om die Spele te organiseer is een van die ingewikkeldste projekte ter wêreld.

# Die finansiële aanwysers: Die rand verhandel teen 18-rand-10-sent teen die dollar, 19-rand-1-sent teen die euro en 22-rand-81-sent teen die pond. Bitcoin verhandel teen 93-duisend-382-dollar. Die prys van goud is twee-duisend-646-dollar-31-sent per fynons en die prys van Brent-ruolie 72-dollar-50-sent per vat.

# En ten slotte: Die Suid-Afrikaanse kinderster Litlhonolofatso Litlhakanyane gaan optree in die internasionale rolprent Bird Boy. Die Hollywoodster Tèa Leoni vertolk die hoofrol en die regisseur is Joel Soisson. Dit is die 13-jarige se tweede internasionale fliek na sy hoofrol in Thabo and the Rhino Case. Litlhonolofatso is veral bekend as Tebello in Scandal op e.tv.

Bly ingeskakel vir meer nuus……………….