Nuus 12:00
BULLETIN NUUSAGENTSKAP 26 November 12 nm
Goeiemiddag. Ek is……..
In die bulletin:
# Die regering stel nuwe maatreëls in teen geslagsgeweld
# Rugby: Die Blitsbokke het duidelike doelwitte vir die seisoen onder nuwe afrigter Philip Snyman
# En, FNB voorspel besteding van drie-miljard rand tydens die komende Swart Vrydag-naweek
# Die regering het met nuwe maatreëls teen geslagsgeweld begin, insluitend aanlyn aansoeke vir beskermingsbevele, beter forensiese laboratoriums en verbeterde hofgeriewe vir slagoffers. Die veldtog van 16 Dae van Aktivisme vir geen Geweld teen Vroue en Kinders het amptelik afgeskop in Rustenburg, Noordwes, en duur tot 10 Desember. Adjunkpresident Paul Mashatile het in sy hoofrede gesê die regering gaan ook voort om burgerlike organisasies en slagoffers te ondersteun met finansiële hulp en psigo-maatskaplike dienste:
# Die minister van Internasionale Betrekkinge en Samewerking, Ronald Lamola, het Suid-Afrika se verbintenis tot geregtigheid, vrede en selfregering vir Palestyne bevestig. Hy het deelgeneem aan die Verenigde Nasies se 47ste Internasionale Dag van Solidariteit met die Palestynse mense. Lamola sê ‘n tweestaat-oplossing is die enigste manier waarop Israel in vrede met die Palestyne kan saamleef. Hy sê dit sluit ʼn onafhanklike Palestynse staat met internasionaal-aanvaarde grense in:
Die opperleier van Iran, Ajatolla Ali Khamenei, kritiseer intussen die Internasionale Strafhof se lasbriewe vir die inhegtenisneming van Israelse leiers en vra hulle moet eerder tereggestel word. Die lasbriewe is vir premier Benjamin Netanyahu en die voormalige minister van Verdediging, Yoav Gallant, vir beweerde oorlogsmisdade in Gaza. Khamenei bestempel die leiers as misdadigers wat die doodstraf verdien. Iran ondersteun Hamas en Hizbollah en steun steeds hulle optrede teen Israel. Dit verhoog die spanning, want hulle dreig mekaar oor en weer terwyl die konflikte in Gaza en Libanon voortduur.
# Rugby: Die Blitsbokke het na die Verenigde Arabiese Emirate vertrek waar die nuwe seisoen van die sewes-wêreldreeks die naweek in Dubai begin. Die span het die vorige seisoen op ‘n hoogtepunt geëindig met brons op die Olimpiese Spele in Parys, maar kon slegs sewende eindig op die reeks se punteleer. Mede-kaptein Impi visser sê hulle het duidelike doelwitte vir die seisoen onder nuwe afrigter Philip Snyman, en behalwe om op die veld te wen wil hulle ook goeie mense van die veld af wees.
# Die finansiële aanwysers: Die rand verhandel teen 18-rand-17-sent teen die dollar, 19-rand-3-sent teen die euro en 22-rand-78-sent teen die pond. Bitcoin verhandel teen 93-duisend-374-dollar. Die prys van goud is twee-duisend-617-dollar-8-sent per fynons en die prys van Brent-ruolie 72-dollar-56-sent per vat.
# Om mee af te sluit: FNB voorspel meer as 19,5-miljoen transaksies ter waarde van drie-miljard-rand gedurende vanjaar se Swart Vrydag-naweek, omdat dit saam val met betaaldag en ekonomiese herstel. Digitale betalings sal na verwagting met 40-persent styg, met aanlyn verkope wat met tien-persent sal toeneem. Kleinhandelaars is optimisties oor sterk verbruikersbesteding, ondersteun deur rentekoersverlagings en onttrekkings deur die tweepot-aftreestelsel. Intussen voorspel ontleders dat Swart Vrydag-verkope 88-miljard rand tot Suid-Afrika se ekonomie kan voeg.
Bly ingeskakel vir meer nuus……………….