Nuus 12:00

BULLETIN 12 Augustus 12 nm

Goeiemiddag. Ek is……..

In die bulletin:

# Minister Tau sê Suid-Afrika gaan ‘n hersiene tariefaanbod aan Amerika voorlê 
# Binnelandse Sake se gebou in Germiston word aan die brand gesteek
# En die appèlaansoeke van die drie skuldiges in die Joslin Smith-saak word aangehoor

# Die minister van Handel, Nywerheid en Mededinging, Parks Tau, sê die kabinet het Suid-Afrika se voorlegging van ‘n hersiene aanbod aan Amerika goedgekeur as die grondslag vir onderhandelings. Hy en die minister van Landbou, John Steenhuisen, het ‘n voorlegging gedoen oor die regering se reaksie op die tarief van 30-persent wat Amerika op ingevoerde Suid-Afrikaanse goedere geplaas het. Tau sê sleutel-Amerikaanse handelskwessies is pluimvee, bloubessies en varkvleis:

# Binnelandse Sake se gebou in Germiston, Gauteng, is vanoggend aan die brand gesteek te midde van gewelddadige betogings oor uitsettings in die middestad. Betogers eis volgens berigte om gratis in die Pharoepark-woonstelgebou te woon. Die Ekurhuleni-nooddienste, die polisie en die verkeersafdeling is ontplooi. Die owerhede het President-, Queen- en Jackstraat gesluit terwyl die brandweer die brand bestry en wetstoepassers probeer om orde te herstel. Die situasie wek kommer oor moontlike skade aan noodsaaklike regeringsdienste.

# Die Wes-Kaapse Hooggeregshof hoor die volgende twee dae aansoeke aan om verlof tot appèl teen die skuldigbevinding en lewenslange vonnisse in die Joslin Smith-saak. Kelly Smith, Jacquen Appollis en Steveno van Rhyn is in Mei tot lewenslange tronkstraf gevonnis vir mensehandel en tien jaar vir ontvoering. Hulle saak hou verband met die verdwyning van Smith se jong dogter in Februarie verlede jaar. Regter Nathan Erasmus sal ook besluit of die gewese beskuldigde wat staatsgetuie geword het, Lourentia Lombaard, strafregtelik aangekla moet word. Joslin is steeds nie gevind nie.

Nuus uit die buiteland:

# ‘n Britse rugsaktoeris wat in Wes-Australië op ‘n werksvakansievisum was, het skuldig gepleit aan die moord op ‘n man wat sy met ‘n e-bromponie raakgery het met ‘n bloedalkoholvlak meer as drie keer die wettige perk. Die 25-jarige Alicia Kemp en ‘n vriend het die bromponie gehuur nadat hulle by ‘n kroeg uitgeskop is. Sy het die 51-jarige Thanh Phan in Perth se middestad getref en die pa van twee is twee dae later in die hospitaal dood. Kemp bly in aanhouding tot sy gevonnis word.

# Rugby: Die Springbok-vrouegroep kom vandag in Johannesburg byeen voor hulle Donderdag na Engeland vertrek vir die Wêreldbeker. Twee-en-dertig spelers onder leiding van Nolusindiso Booi is gekies en die span spog met spelers wat altesaam 689 keer vir die Bokke uitgedraf het. Suid-Afrika kom in Groep D teen Brasilië, Italië en Frankryk te staan. Die Bok-vroue se hoofafrigter, Swys de Bruin, sê hy is opgewonde oor die kombinasies waarmee hulle kan werk en hy glo dit sal hulle tot in die uitspeelrondes bring:

# En die finansiële aanwysers: Die rand verhandel teen 17-rand-69-sent teen die dollar, 20-rand-56-sent teen die euro en 23-rand-81-sent teen die pond. Bitcoin verhandel teen 118-duisend-883-dollar. Die prys van goud is drie-duisend-350-dollar-36-sent per fynons en die prys van Brent-ruolie is 66-dollar-49-sent per vat.

Bly ingeskakel vir meer nuus……………….