Nuus 12:00

BULLETIN NUUSAGENTSKAP 18 November 12 nm

Goeiemiddag. Ek is……..

In die bulletin:

# Die Grensbestuursowerheid onderskep ‘n verdagte op Interpol se lys van mees gesoekte misdadigers
# Rugby: Die Walliese afrigter Warren Gatland heroorweeg sy toekoms na die rekord-nederlaag teen Australië
# En, Suid-Afrika se rolprentbedryf floreer

# Amptenare van die Grensbestuursowerheid het ‘n Duitse burger op die OR Tambo-internasionale lughawe in Gauteng onderskep wat op Interpol se lys van mees gesoekte misdadigers is. Die man het agt jaar lank inhegtenisneming ontwyk vir dwelmhandel. Mmemme Mogotsi van die owerheid sê daar is ook ‘n internasionale lasbrief vir sy inhegtenisname uitgereik. Sy sê hy het in Malawi onder ‘n nuwe identiteit gewoon en was in besit van ‘n tydelike Malawiese verblyfpermit:

# Die Stad Kaapstad bied hulp aan Gautengse munisipaliteite wat watertekorte ondervind. Plaaslike owerhede word aangemoedig om vlak-twee-waterbeperkings in te stel om hulle watervoorsiening met 30-persent te sny. Die burgemeesterskomiteelid vir Water en Sanitasie, Zahid Badroodien, het aan eNCA gesê hulle amptenare verskaf steun en kundigheid aan sukkelende Gautengse munisipaliteite:

# Volgens nuwe navorsing stel tropiese vleilande ongekende vlakke van metaangas vry wat wêreldwye pogings bedreig om klimaatsverandering die hoof te bied. Metaan is ‘n kragtige kweekhuisgas en 80 keer meer doeltreffend as koolstofdioksied om hitte oor 20 jaar vas te vang. Studies skryf die skerp styging toe aan tropiese streke, met die Kongo, Suidoos-Asië, die Amasone en die suide van Brasilië as die groot bydraers. Ondanks globale beloftes om metaangas teen 2030 met 30-persent van sy 2020-vlak te verminder, is die vrystellings van fossielbrandstowwe steeds te hoog.

# Rugby: Wallis se afrigter, Warren Gatland, sê hy sal nou oor sy toekoms besin nadat sy span sy elfde agtereenvolgende toets verloor het. Australië het Wallis gister in Cardiff 52-20 afgeransel. Gatland het ná die wedstryd met die Walliese Rugby-unie se voorsitter, Richard Collier-Keywood, en die uitvoerende direkteur van rugby, Nigel Walker, vergader. Wallis pak Saterdag die wêreldkampioen, Suid-Afrika. Gatland sê dis die uitdagendste tyd wat hy nog as afrigter beleef het:

# Die finansiële aanwysers: Die rand verhandel teen 18-rand-11-sent teen die dollar, 19-rand-12-sent teen die euro en 22-rand-88-sent teen die pond. Bitcoin verhandel teen 91-duisend-907-dollar. Die prys van goud is twee-duisend-586-dollar-4-sent per fynons en die prys van Brent-ruolie 71-dollar-24-sent per vat.

# En ten slotte: Buitelandse rolprentproduksiebeleggings in Suid-Afrika het 2,52-miljard-rand bedra tussen November verlede jaar en Junie vanjaar, met beramings van meer as vyf-miljard-rand teen Oktober volgende jaar. Internasionale produksiespanne het tussen November 2023 en Augustus vanjaar meer as 59-duisend hotelbednagte bespreek, wat ‘n inspuiting van byna 148- miljoen-rand in die land se gasvryheidsbedryf was. Die bedryf het die afgelope agt maande 26-duisend-573 werksgeleenthede geskep. Die stigter van die Internasionale Toerisme-rolprentfees Afrika, James Byrne, sê die land se rolprentbedryf sal steeds bydra tot die uitbreiding van die ekonomie en internasionale toerisme.

Bly ingeskakel vir meer nuus……………….