Nuus 12:00

BULLETIN NUUSAGENTSKAP 11 September 12 nm

Goeiemiddag. Ek is……..

In die bulletin:

# Ramaphosa wil die Bela-wet Vrydag bekragtig
# Najwa Petersen se paroolverhoor vind vandag plaas
# En, internasionale erkenning vir die Suid-Afrikaanse popsangeres Tyla

# President Cyril Ramaphosa beplan om Vrydag die Wysigingswetsontwerp op Basiese Onderwyswette by die Uniegebou in Pretoria te bekragtig. Die Bela-wet wysig dele van die Suid-Afrikaanse Skolewet van 1996 en die Wet op die Indiensneming van Opvoeders van 1998. Dit word beskou as aanpassing by ontwikkelings in die onderwysveld sedert die oorspronklike wetgewing. Ramaphosa sê die wetgewing sal beheer oor die land se onderwyssektor versterk.

# Die paroolverhoor van Najwa Dirk Petersen, wat in 2006 gevonnis is vir die moord op haar man, die musikant Taliep Petersen, vind vandag by die Pollsmoor Korrektiewe Sentrum in Kaapstad plaas. Sy het 18-jaar uitgedien omdat sy die teregstellingstyl-moord van haar man gereël het. Dirk Petersen het aanvanklik onskuldig gepleit en aangevoer dit was huisbraak, maar later erken sy was die baasbrein. Tydens haar laaste paroolverhoor het haar man se kinders gewys op haar gebrek aan empatie en vir voortgesette sielkundige hulp gevra.

# Die Suider-Afrikaanse Stigting vir die Bewaring van Kusvoëls sê hy is bekommerd oor die kolonie Afrika-pikkewyne op St Croix-eiland in die Oos-Kaap na ‘n oliestorting in Algoabaai wat die kolonie kan bedreig. Die Suid-Afrikaanse Maritieme Veiligheidsowerheid ondersoek die storting wat vermoedelik van die vragskip, MSC Apollo, kom. Die stigting sê die storting kan ook ander seevoëls soos witmalgasse en kormorante raak.

# Rugby: Die Bulle se afrigter, Jake White, sê sy span is waarskynlik die naaste ooit daaraan om die balans tussen jeug en ervaring in die groep reg te kry. Hulle het verlede jaar die titel in die Verenigde Rugbykampioenskap misgeloop toe hulle teen Glasgow Warriors verloor het. White sê hy hoop die ervaring wat hulle opgedoen het, sal sy span help in die kampioenskap se uitspeelrondes:

# Die finansiële aanwysers: Die rand verhandel teen 17-rand-86-sent teen die dollar, 19-rand-72-sent teen die euro en 23-rand-37-sent teen die pond. Bitcoin verhandel teen 56-duisend-529-dollar-31-sent. Die prys van goud is twee-duisend-523-dollar-14-sent per fynons en die prys van Brent-ruolie 70-dollar-29-sent per vat.

# En ten slotte: Die Suid-Afrikaanse pop-ster Tyla is by ʼn geleentheid in New York deur Billboard Magazine met die Global Impact-toekenning vereer. Die 22-jarige sangeres is bekend vir haar treffer, Water, waarvoor sy ʼn Grammy-toekenning gekry het. Sy het in Julie die Billboard-toekenning vir Beste Nuwe Kunstenaar en Beste Internasionale Vertoning ontvang. Tyla sê dis ʼn droom om dit waarvoor sy lief is op die internasionale verhoog te doen:

Bly ingeskakel vir meer nuus……………….