Nuus 12:00

NUUSFLITS NUUSAGENTSKAP 13 November 12 nm

Goeiemiddag. Ek is……..

In die bulletin:

# Prasa stel die landwye TravelOffPeak-veldtog bekend
# Die Onderwysdepartement vra nie-regeringsorganisasies om te help met die voorkoming van selfdood onder leerders
# En, krieket: Die besturende direkteur van Engeland vat die blaam vir die Wêreldbeker-treurmare

# Die Passasierspooragentskap van Suid-Afrika het die TravelOffPeak-veldtog bekendgestel, ‘n inisiatief wat daarop gemik is om passasiers buite spitstye te lok deur aantreklike tariefafslag aan pendelaars te bied. Van vandag af bied Prasa verskeie buitespitstyd-afslagpakette aan op al sy roetes in bedryf. Prasa se woordvoerder, Andiswa Makanda, sê, dit is ‘n belangrike stap om pendelaargetalle te verbeter terwyl passasiers geld spaar met laer kaartjietariewe:

Speel klankgreep: ENG AndiswaonTravelOffPeak

# Die Gautengse Onderwysdepartement het nie-regeringsorganisasies en ander instellings versoek om te help met die voorkoming van leerderselfdood. Die departement het ‘n styging in leerderselfdood gesien. Die jongste geval is dié van ‘n graad ses-leerling wat sy eie lewe geneem het nadat hy na bewering by die Primêre Skool Khehlekile aan die Oos-Rand geboelie is. Die opvoedkundige sielkundige, Fred Schouwink, het aan eNCA gesê die toename in leerderselfdood is ‘n groot bron van kommer:

Speel klankgreep: ENG-SchouwinkOnSuicide

# Africa Unite doen ‘n beroep vir die beskerming en integrasie van buitelanders in Suid-Afrika ná die skietdood verlede week van twee Somali-burgers in Philippi, Kaapstad. Lelethu Nogwavu van die organisasie sê hulle veroordeel die teiken van buitelanders, veral kleinsake-eienaars. Africa Unite het ook sy kommer uitgespreek oor die regering se voorstel om spaza-winkels in buitelanders se hande te oudit. Dit volg na verskeie voorvalle waar kinders gesterf het na hulle kos geëet het wat na bewering by straatsmouse en spaza-winkels gekoop is. Nogwavu sê as dit spesifiek gerig is op buitelanders, sal dit vreemdelinge-haat vererger.

# Krieket: Engeland se besturende direkteur, Rob Key,  sê hy meer as enigiemand anders,  moet blameer word vir die span se uiters swak vertoning by die Wêreldbeker in Indië. Die verdedigende kampioene kon nie die halfeindstryde haal nie na hulle met ses nederlae in hulle eerste sewe wedstryde die aftog moes blaas. Engeland was aanvanklik een van die gunstelinge van die toernooi, maar hulle was heel onder op die punteleer, totdat oorwinnings teen Nederland en Afghanistan hulle tot die sewende plek opgeskuif het. Keys het toegegee sy prioriteit was toetswedstryde eerder as die beperkte 50-boulbeurt-formaat:

Speel klankgreep : ENG KeysOnTestPriority

# Die finansiële aanwysers: Die rand verhandel teen 18-rand-68-sent teen die dollar, 19-rand-99-sent teen die euro en 22-rand-87-sent teen die pond. Bitcoin verhandel teen 36-duisend-974-dollar-60-sent. Die prys van goud is een-duisend-936-dollar-32-sent per fynons en die prys van Brent ruolie 80-dollar-67-sent per vat.

# Om mee af te sluit: Die Franse president, Emmanuel Macron, het hom verbind tot die besteding van meer as 20-miljard-rand aan navorsing van nou tot 2030, te midde van kommer oor smeltende pool-ys en gletsers. Die lot van die aarde se poolstreke en gletsers het volgens berigte groot bekommernis veroorsaak by talle wetenskaplikes, want hittegolwe gaan blykbaar nou gereeld by albei pole voorkom. Wetenskaplikes waarsku die helfte van die wêreld se 200-duisend gletsers kan teen die einde van die eeu verdwyn. Macron sê dit is ‘n bedreiging wat dringende aandag nodig het.

Bly ingeskakel vir meer nuus……………….