Nuus 11:00

BULLETIN 27 Augustus 11 vm

Goeiemôre. Ek is……..

In die bulletin:

# Die GOOD-party wil appelleer teen die Verkiesingshof-beslissing oor ‘n onverklaarde skenking aan sy verkiesingsveldtog
# Minister Aucamp verleng die registrasiedatum vir die lewering van vee vir uitvoere na die VAE
# En tennis: Die Tsjegge Muchova en Mensik is die Amerikaanse Ope se gemengde dubbelspelkampioene

# Die GOOD-party wil appelleer teen die Verkiesingshof se beslissing dat hy die Wet op die Befondsing van Politieke Partye oortree het. Die hof sê GOOD en sekretaris-generaal Brett Herron het versuim om ʼn skenking van 900-duisend-rand voor 2021 se munisipale verkiesing te verklaar. GOOD moet 50-duisend-rand betaal vir die oortreding van Artikel 9, en die party en Herron, as rekenpligtige amptenaar, ʼn administratiewe boete van 40-duisend-rand. Herron sê die uitspraak is foutief:

# Die minister van Landbou, Willie Aucamp, het die registrasiedatum verleng vir plase en voerkrale wat slagvee lewer vir rooivleisuitvoere na die Verenigde Arabiese Emirate. Hulle het nou tot einde Desember om die nodige stelsels in te stel om te voldoen aan die regulasies van Veeartsenykundige Prosedurele Kennisgewing nommer 59. Aucamp sê die departement is daartoe verbind om Suid-Afrikaanse produsente te ondersteun terwyl hulle na belangrike wêreldmarkte uitbrei:

# Die DA sê politieke ampsdraers in Noordwes moet onderwerp word aan verpligte en onafhanklike leefstyloudits. Die party voer aan finansiële verklarings alleen is nie genoeg nie en moet nagegaan word om moontlike belangebotsings, onverklaarbare rykdom en ander finansiële rooi vlae te identifiseer. Freddy Sonakile van die DA sê die oudits moet regverdig en onafhanklik uitgevoer word, met waarborge vir privaatheid en behoorlike regsprosesse, om aanspreeklikheid in openbare ampte te versterk.

Nuus uit die buiteland:

# Die sterftesyfer in die rampspoedige kitsvloede wat Nepal en Tibet getref het, het tot 162 gestyg terwyl een-duisend-384 mense vermis word, insluitend vier Suid-Afrikaners. Onder die vermiste persone is 177 van Indië, 63 van Amerika, 34 van Australië, 33 van Brittanje en 25 van Kanada. Owerhede sê die bergagtige terrein, gure weer en versperde paaie belemmer reddingspogings. China se president, Xi Jinping, sê die dringendste taak is om alles moontlik te doen om die vermiste persone te soek en te red.

# Tennis: Die Tsjegge Karolina Muchova en Jakub Mensik is die nuwe Amerikaanse Ope-gemengde dubbelspelkampioene. Hulle het 17,6-miljoen-rand verdien nadat hulle Belinda Bencic van Switserland en die Italianer Flavio Cobolli verslaan het vir hul eerste Grand Slam-titel. Muchova en Mensik het die eindstryd bereik nadat hulle in die halfeindronde twee wedstrydpunte afgeweer het teen Mirra Andreeva en Andrey Rublev van Rusland. Muchova sê hulle het nie verwag om te wen nie:

# En die finansiële aanwysers: Die rand verhandel teen 15-rand-94-sent teen die dollar, 18-rand-57-sent teen die euro en 21-rand-67-sent teen die pond. Bitcoin verhandel teen 78-duisend-759-dollar. Die prys van goud is vier-duisend-604-dollar-61-sent per fynons en die prys van Brent-ruolie is 87-dollar-72-sent per vat.

Bly ingeskakel vir meer nuus……………….