Nuus 11:00

NUUSFLITS NUUSAGENTSKAP 17 November 11 vm

Goeiemôre. Ek is……..

In die bulletin:

# Die Departement van Basiese Onderwys sê geen matriekvraestelle het uitgelek nie
# Human Rights Watch sê daar is nie genoeg bewyse om die Al-Shifa-hospitaal se status te herroep nie
# En rugby, die Bulle en Edinburgh begin die naweek se Verenigde Rugbykampioenskapsaksie in die Skotse hoofstad

# Die Departement van Basiese Onderwys het vals gerugte op sosiale media veroordeel, dat sommige matriekvraestelle uitgelek het.  Altesaam 136 van die 231 vraestelle is reeds sonder voorval geskryf. Die departement se woordvoerder, Elijah Mhlanga, sê die vals plasings op sosiale media is misleidend en wil onnodige verwarring en paniek veroorsaak:

Speel klankgreep: ENG ElijahonExamsPapers

# Die voormalige Paralimpiese atleet Oscar Pistorius sal twee dae ná sy 37ste verjaardag sy lot weet met die paroolraad wat na verwagting volgende week Vrydag ‘n datum vir sy vrylating sal bepaal. Die Konstitusionele Hof het in Oktober bevind dat hy reeds die minimum vonnis uitgedien het vir die moord op sy vriendin Reeva Steenkamp op Valentynsdag in 2013.  Die hof het ook opdrag gegee dat sy vonnis tot Julie 2016 terugdateer word. Die Departement van Korrektiewe Dienste het tydens Pistorius se appèlaansoek voor die Konstitusionele Hof erken dat hy in Maart vanjaar reeds sy minimum vonnis uitgedien het.

# Human Rights Watch sê beeldmateriaal wat deur Israel vrygestel is, van wapens wat volgens hulle in die Al-Shifa-hospitaal in Gaza gevind is, is nie voldoende vir die herroeping van die hospitaal se beskerming-status onder die oorlogswette nie. Die Israeliese weermag sê hulle het ‘n Hamas-tonnelskag en ‘n voertuig met wapens by die hospitaal blootgelê. Human Rights Watch sê Israel het nie bewys dat skadelike dade vanuit die hospitaal gepleeg is nie. Intussen sê die Withuis se woordvoerder vir die Nasionale Veiligheidsraad, John Kirby, dit is duidelik dat Hamas die hospitaal as ‘n bevelsentrum gebruik:

Speel klankgreep: ENG KirbyOnHamasTargets

# Rugby: Die Bulle en Edinburgh skop vanaand die naweek se Verenigde Rugbykampioenskapsaksie in die Skotse hoofstad af. Terselfdertyd kom die Leeus teen die Ierse span Ulster te staan. Môre verwelkom die Haaie nog ‘n Ierse span, Connacht, in Durban, terwyl die Stormers ‘n weg-wedstryd teen Munster in Ierland het. Die Bulle is tans boaan die punteleer na drie oorwinnings uit vier wedstryde. Die Stormers is agste na twee oorwinnings en twee nederlae. Die Leeus is twaalfde en die Haaie in die 16de en laaste plek.

# Die finansiële aanwysers: Die rand verhandel teen 18-rand-42-sent teen die dollar, 19-rand-98-sent teen die euro en 22-rand-81-sent teen die pond. Bitcoin verhandel teen 36-duisend-300-dollar-7-sent. Die prys van goud is een-duisend-983-dollar-65-sent per fynons en die prys van Brent ruolie 77-dollar-40-sent per vat.

# En, om mee af te sluit: Die internasionale filantroop, Melinda Gates, sal vandag die 13de Desmond Tutu Internasionale Vredeslesing by die Kaapstadse Internasionale Konferensiesentrum lewer. Die tema van vanjaar se Vredeslesing is, Ontsluit Vroue se Krag vir Vrede en Voorspoed. Gates sal die tweede internasionale figuur wees wat die lesing lewer in die afwesigheid van die ontslape Aartsbiskop, wat in Desember 2021 oorlede is. Die Desmond en Leah Tutu-stigting sê Gates sal fokus op die transformerende potensiaal van vroue in die samelewing, en hulle invloed op hul gesinne, op gemeenskappe en kulture, en op die pad na vrede en voorspoed.

Bly ingeskakel vir meer nuus……………….