Nuus 11:00

BULLETIN 22 Februarie 11 vm

Goeiemôre. Ek is……..

In die bulletin:

# Die ANC sê die stryd teen misdaad is nog nie verby nie
# Herman Mashaba is ActionSA se burgemeesterskandidaat vir Johannesburg
# En dodelike ontploffings in westelike Oekraïne word as ’n ‘terroriste-aanval’ ondersoek

# Die ANC sê die land se stryd teen misdaad is nog lank nie verby nie. Die misdaadstatistiek vir die derde kwartaal van die 2025/2026-boekjaar toon ‘n 8,7-persent daling in moord, 11,3-persent daling in roof met verswarende omstandighede en 8,1-persent in kapings. ANC-woordvoerder Mahlengi Bhengu sê die dalende neiging wys wanneer strategie en uitvoering ontmoet, is daar gevolge:

Die Forum for South Africa het intussen ŉ beroep op die regering gedoen om ŉ omvattende nasionale noodstrategie teen misdaad te ontwikkel. FOSA-leier Tebogo Mashilompane sê terwyl die regering voortgaan om misdaadstatistiek voor te hou as ‘n teken van deursigtigheid, leef Suid-Afrikaners onder beleg. Hy sê gemeenskappe landwyd word daagliks geteister deur misdadigers, georganiseerde sindikate, dwelmbase, onwettige vuurwapens en herhaaldelike oortreders wat sonder vrees vir gevolge misdade pleeg:

# ActionSA se president Herman Mashaba is die party se burgemeesterskandidaat vir die Stad Johannesburg in die komende munisipale verkiesing. Mashaba was van 2016 tot 2019 die stad se DA-burgemeester. Hy het in sy aanvaardingstoespraak gesê ActionSA bied kiesers geleentheid om Johannesburg se verval te keer. Mashaba het Operation Fix Joburg as deel van sy veldtog bekendgestel:

# Die burgerregte-organisasie, AfriForum, verwelkom president Cyril Ramaphosa se besluit om op hierdie stadium nie enige artikels van die Wet op Nasionale Gesondheidsversekering te bekragtig nie, tot uitspraak gelewer word in openbaredeelname-sake teen die wet. Louis Boshoff van AfriForum sê dit wys Ramaphosa dink twee keer oor die NGV se instelling:

# Minstens een persoon is dood en tientalle beseer in ontploffings wat die westelike Oekraïnse stad, Lwiv, vroeër vandag getref het. Owerhede beskryf dit as ŉ terroriste-aanval. Die eerste ontploffing het by ŉ winkel naby die middestad plaasgevind nadat die polisie op die toneel opgedaag het, en is gevolg deur nog ŉ ontploffing toe ŉ tweede groep polisiebeamptes daar aankom. ŉ Drie-en-twintigjarige polisievrou is dood terwyl ŉ polisievoertuig en ŉ burgerlike voertuig beskadig is. Intussen is Oekraïne se hoofstad, Kiëf ook oornag met missiele en hommeltuie aangeval.

# En tennis: Carlos Alcaraz was op sy verwoestende beste toe hy die Katar Ope-titel gebuit het na ŉ genadelose sege van 6-2, 6-1 oor Arthur Fils. Die sewemalige Grand Slam-kampioen het net meer as 50 minute nodig gehad om die Fransman af te ransel en sy 26ste loopbaantitel op te raap. Die Doha-oorwinning volg na sy sukses by die Australiese Ope vroeër die maand toe hy op 22 ‘n loopbaan-Grand Slam behaal het. Dit was sy eerste toernooi sedert Melbourne en hy het nou sy aantal agtereenvolgende oorwinnings tot 12 uitgebrei.

Bly ingeskakel vir meer nuus……………….