Nuus 11:00

BULLETIN 27 September 11 vm

Goeiemôre. Ek is……..

In die bulletin:

# Die Gautengse adjunk-polisiekommissaris is aangestel om toesig te hou oor top-moordsake
# Eskom lewer steeds bestendig en volhoubare elektrisiteitsvoorsiening
# En AfriForum veroordeel die aanval op die Paul Kruger-standbeeld

# Die waarnemende adjunk-nasionale polisiekommissaris, Khasi Senthumule, het die adjunk-provinsiale kommissaris van Gauteng, Mbuso Khumalo, aangestel om toesig te hou oor ‘n dubbelmoordondersoek. Dit handel oor die moord op pa en seun, Cloete en Thomas Murray, en die moord op prokureur Bouwer van Niekerk. Die Murray-skietery het in Maart 2023 langs die N1 tussen Johannesburg en Pretoria plaasgevind. Van Niekerk is vroeër vandeesmaand in die kantoor van SmithSew-prokureurs in Sandton doodgeskiet.

# Eskom sê hy lewer steeds ‘n bestendige en volhoubare elektrisiteitsvoorsiening vir die land. Eskom-woordvoerder, Daphne Mokwena, sê die energiebeskikbaarheidsfaktor wissel tussen 65- en 71-persent, met die maand-tot-datum gemiddeld bo 70-persent op 71,15-persent. Sy sê die laaste keer dat dit so hoog was, was in 2021:

Die Nasionale Energiereguleerder het intussen die begin van ‘n marknavorsingsprojek aangekondig gefokus op die instelling en uitwerking van vaste en ander verwante koste wat deur elektrisiteitsverspreiders, insluitend Eskom en munisipaliteite, gehef word. NERSA se woordvoerder, Charles Hlebela, sê die ondersoek is daarop gemik om te vas te stel hoe verspreiders hulle koste geformuleer het, wat gelei het tot buitensporige toevoegings tot die goedgekeurde tariefverhoging van 12,74-persent wat vir Eskom in die 2025/2026-boekjaar toegestaan is:

# AfriForum het die aanval op die Paul Kruger-standbeeld op Kerkplein in Pretoria veroordeel, waar dele van twee Boere-krygerstandbeelde en die veiligheidsheining beskadig is. Die voorval volg ‘n week nadat die EFF die verwydering van Afrikanermonumente in die Parlement versoek het. Ernst van Zyl van AfriForum sê die organisasie sal strenger sekuriteit en herstelwerk eis en belowe om die Afrikaner-erfenis te verdedig:

# En laastens sportnuus:

# Gholf: Span Europa het ‘n sterk voorsprong van 5,5 tot 2,5 oor die Verenigde State behaal op die eerste dag van die Ryderbeker op die Bethpage Black-baan in New York. Die besoekers het die oggend se vierbalstryd oorheers met ‘n voorsprong van 3-1, gekenmerk deur indrukwekkende oorwinnings van Jon Rahm en Tyrrell Hatton, Ludvig Åberg en Matt Fitzpatrick, en Rory McIlroy en Tommy Fleetwood. Hoewel die Amerikaanse span, aangevuur deur ‘n luidrugtige tuisskare, in die middag se vierbal-kompetisie teruggeveg het, het Europa die sessie met 2,5-1,5 gewen om hul voorsprong te vergroot.

# En duik: Die Russiese vryduiker Alexey Molchanov het 126 meter met ‘n enkele asemteug geduik om ‘n nuwe wêreldrekord op te stel by die AIDA-vryduikwêreldkampioenskap in Limassol, Ciprus. Hy het diep in die Middellandse See afgeduik met niks anders as ‘n koplig, twee vinne en ‘n tou as ‘n gids nie. Dit word beskou as een van die tegnies mees uitdagende vryduikkategorieë. Molchanov het sy eie 2024-wêreldrekord van 125 meter verbeter, waartydens hy sy asem vir ‘n verstommende vier-minute-en-32-sekondes opgehou het.

Bly ingeskakel vir meer nuus……………….