Nuus 11:00

BULLETIN 20 September 11 vm

Goeiemôre. Ek is……..

In die bulletin:

# Die Madlanga-kommissie doen verslag oor die vordering in sy eerste week
# Die Wes-Kaap bevestig ‘n gladde begin van sy buitengewone taxi-maatreëls
# En rugby: Die Kanadese vroue beëindig Nieu-Seeland se heerskappy as wêreldkampioene

# Die woordvoerder van die Madlanga-kommissie, Jeremy Michaels, het die kommissie se eerste week as ‘n belangrike mylpaal geloof en sê daar was vordering ondanks openbare skeptisisme en vertragings. Die kommissie ondersoek bewerings van politieke inmenging deur die KwaZulu-Natalse polisiekommissaris, Nhlanhla Mkhwanazi. Michaels het aan Newzroom Afrika gesê ernstige bewerings is nou geboekstaaf en kruisondervraging kan voortgaan. Hy het bevestig dat ‘n ander getuie volgende week getuienis sal lewer:

Die KZN Geweldsmonitor, Mary de Haas, het intussen ontken dat haar brief aan die geskorste polisieminister Senzo Mchunu gelei het tot die ontbinding van die taakspan vir politieke moorde. De Haas het aan Newzroom Afrika gesê haar brief versoek ‘n ondersoek nadat sy die eenheid sedert 2018 gemonitor het. Sy het beklemtoon dat verskeie faktore, insluitend begrotingsbeperkings, tot die besluit bygedra het, en verwag parlementêre toesig nie regstreekse optrede nie:

# Die Wes-Kaapse regering sê buitengewone maatreëls wat Woensdag ingestel is om die minibus-taxibedryf te bestendig, het sonder voorval verloop. Die 30-dae sluiting, wat kragtens Artikel 91 van die Nasionale Landvervoerwet afgedwing word, raak roetes in Mfuleni, Khayelitsha, Somerset-Wes, Nomzamo en Lwandle. Golden Arrow-busdienste het ritte bygevoeg om pendelaars te help, terwyl wetstoepassing op hoë gereedheidsgrondslag bly. Die LUR vir Mobiliteit, Isaac Sileku, het pendelaars, operateurs en beamptes bedank vir die versekering van veiligheid en bestendigheid.

# Die Joburg Crisis Alliance het die burgemeester van Johannesburg, Dada Morero, versoek om te bedank, aangesien gemeenskappe in Claremont, Westbury en Coronationville steeds sonder water is ten spyte van ‘n sewe-dag belofte. Die alliansie sê inwoners sukkel omdat vier-miljard-rand wat vir Johannesburg Water bedoel was, onwettig herlei is, en infrastruktuurprojekte onvoltooid gelaat het. Die alliansie sê plaaslike inwoners eis dringende verantwoordbaarheid, ‘n forensiese ondersoek na die afgedeelde fondse, en onmiddellike nasionale ingryping.

# Rugby: Kanada het die kampioene Nieu-Seeland se heerskappy as houers van die Vrouerugby-wêreldbeker beëindig met ‘n briljante 34-19 halfeindstrydoorwinning in Bristol gister. Dit was die Swart Varings se eerste nederlaag in die toernooi sedert hulle 11 jaar gelede teen Ierland verloor het. Die Kanadese is nou deur na hul tweede Wêreldbeker-eindstryd, nadat hulle in 2014 teen Engeland verloor het. Hulle sal teen die wenners van vandag se tweede halfeindstryd in volgende week se eindstryd op Twickenham uitdraf. Toernooi-gunsteling Engeland sal vanmiddag teen Frankryk in Bristol speel om die ander finalis te bepaal.

# En ten slotte: President Donald Trump sê hy wou nie hê die burgemeester van Londen, sir Sadiq Khan, moet die staatsdinee wat deur die koning by Windsor-kasteel aangebied is, bywoon nie. Sir Sadiq was nie teenwoordig nie, en volgens die BBC het hy nie ‘n uitnodiging gevra of verwag nie. Die twee se langdurige rusie dateer terug na 2015 toe die Arbeiderspolitikus Trump se voorstel veroordeel het dat Moslems verbied moet word om na die VSA te reis. Trump se tweede staatsbesoek aan Brittanje is grootliks gekenmerk deur prag en praal, maar duisende betogers het in die parlementêre plein bymekaargekom om teen die besoek te betoog.

Bly ingeskakel vir meer nuus……………….