Nuus 11:00

BULLETIN 27 Augustus 11 vm

Goeiemôre. Ek is……..

In die bulletin:

# Die Instituut vir Rasseverhoudinge sê Suid-Afrika het ‘n goue geleentheid om sy kiesstelsel te hersien
# Fedusa kritiseer Prasa omdat hy weier om sy salarisooreenkoms gestand te doen
# En Donald Trump dreig weer om ekonomiese sanksies teen Rusland in te stel

# Die Instituut vir Rasseverhoudinge sê Suid-Afrika se huidige verkiesingstelsel slaag nie in sy doel nie. Die Verkiesingspaneel vir Hervorming en Raadpleging doen ‘n omvattende hersiening van die stelsel en moet einde volgende maand aanbevelings aan die Parlement voorlê. Marius Roodt van die instituut sê die land het ‘n verkiesingstelsel nodig wat proporsioneel, regverdig en toerekenbaar is:

# Die vakbondfederasie Fedusa het die Passasierspooragentskap van Suid-Afrika veroordeel vir sy weiering om die 2025/26-salaris-ooreenkoms met die vakbonde Satawu en Untu na te kom. Prasa weier weens finansiële probleme om voort te gaan met die ooreenkoms van ‘n verhoging van 5,5-persent. Die ooreenkoms geld van die einde van hierdie maand af. Fedusa sê hy is woedend dat Prasa die wettige ooreenkoms eensydig wil veronagsaam nadat dit te goeder trou onderteken is onder die leiding van die Kommissie vir Versoening, Bemiddeling en Arbitrasie.

# Die Wes-Kaapse premier, Alan Winde, sê hy gaan ‘n dringende hofbevel aanvra teen die taxi-organisasies CATA en CODETA. Dit volg na die onlangse vlaag dodelike geweld in die taxibedryf. In Philippi-Oos en Khayelitsha in Kaapstad was daar Maandag ŉ reeks skietvoorvalle waarin talle mense dood is. Winde sê die hofbevel sal toelaat dat wetsgehoorsame operateurs pendelaars veilig kan vervoer:

Nuus uit die buiteland:

# Die Amerikaanse president, Donald Trump, het weer gedreig om swaar ekonomiese strafmaatreëls teen Rusland in te stel as president Vladimir Putin weier om die oorlog teen Oekraïne te staak. Trump probeer een-op-een-gesprekke bewerkstelling tussen Putin en president Volodimir Zelensky van Oekraïne. Trump sê hy wil nie nuwe sanksies of tariewe instel wat Rusland se ekonomie benadeel nie, en hoop daar is steeds ŉ manier om die oorlog te beëindig:

# Atletiek: Die wêreld se beste atlete kom vandag in Zurich, Switserland, byeen vir die laaste Diamantliga-byeenkoms. Ses Suid-Afrikaners neem deel aan die tweedaagse geleentheid. Die naellopers Akani Simbine, Shaun Maswanganyi en Bayanda Walaza gaan aan die 100-meter deelneem. Die wêreld se binnenshuise kampioen, Prudence Sekgodiso, neem deel aan die 800-meter, Zenéy van der Walt aan die 400-meter-hekkies en die Olimpiese silwermedalje-wenner Jo-Ané van Dyk aan die spiesgooi. Die internasionale sterre sluit in die Amerikaanse naelloper Noah Lyles en die Sweeds-Amerikaanse wêreldrekordhouer in paalspring, Armand Duplantis.

# En die finansiële aanwysers: Die rand verhandel teen 17-rand-67-sent teen die dollar, 20-rand-53-sent teen die euro en 23-rand-78-sent teen die pond. Bitcoin verhandel teen 111-duisend-87-dollar. Die prys van goud is drie-duisend-376-dollar-78-sent per fynons en die prys van Brent-ruolie 66-dollar-65-sent per vat.

Bly ingeskakel vir meer nuus……………….