Nuus 11:00

BULLETIN 10 Desember 11 vm

Goeiemôre. Ek is……..

In die bulletin:

# Die African Transformation Movement vra ‘n saamgestelde nasionale DNS-databasis
# Bedrywighede word weer opgeskort op die Lebombo-grenspos met Mosambiek
# En, krieket: Die Proteas en Pakistan pak mekaar vanaand in die eerste T20 in Durban

# Die African Transformation Movement sê hy steun heelhartig die skepping en instelling van ‘n saamgestelde nasionale DNS-databasis. Meer as 5,4-miljoen sake is tussen 2018 en 2023 gesluit sonder uitsluitsel. Dit sluit in 61-duisend-740 verkragtingsake, wat neerkom op ‘n gemiddeld van sowat 974 onopgeloste sake elke maand. ATM se woordvoerder, Zama Ntshona, sê sowat 32 slagoffers word elke dag geregtigheid ontsê:

# Die Raad vir Geesteswetenskaplike Navorsing sê 62-persent van die publiek glo die regering se pogings om korrupsie te bekamp, is nie doeltreffend nie. Die raad het die bevindings van ‘n veeljarige studie getiteld bekend gestel. Hy het bevind dat omkopery deur staatsamptenare tussen 2006 en 2023 sterk toegeneem het. Die raad sê die meerderheid van die publiek glo die wet is ten gunste van die rykes en mense met mag.

# Die Grensbestuursowerheid het algemene vragverwerking en die beweging van passasiers tydelik gestaak op die Lebombo-grenspos weens hernude betogings aan die Mosambiekse kant. Die grens is sedert Oktober kort-kort gesluit omdat betogings na die buurland se verkiesing uitgebreek het. Die owerheid se waarnemende kommissaris, Jane Thupana, sê onderhandelinge is met verskeie vakbonde en rolspelers aan die gang om gebeurlikheidsplanne voor te stel:

# Krieket: Suid-Afrika en Pakistan speel vanaand in Durban in die eerste van drie T20’s. Heinrich Klaasen sal die Proteas aanvoer in die afwesigheid van Aiden Markram, wat ‘n blaaskans geniet saam met Marco Jansen, Keshav Maharaj, Kagiso Rabada en Tristan Stubbs, wat in die pas-afgelope toetsreeks teen Sri Lanka gespeel het. Die tweede wedstryd vind Vrydag in Centurion plaas en die laaste een die volgende dag in Johannesburg. Dit word gevolg deur drie eendagwedstryde en twee toetse. 

# Die finansiële aanwysers: Die rand verhandel teen 17-rand-82-sent teen die dollar, 18-rand-83-sent teen die euro en 22-rand-74-sent teen die pond. Bitcoin verhandel teen 97-duisend-265-dollar. Die prys van goud is twee-duisend-669-dollar-78-sent per fynons en die prys van Brent-ruolie 71-dollar-72-sent per vat.

# En die Suid-Afrikaanse operasangeres, Pretty Yende, sê haar optrede met die heropening van die Notre Dame-katedraal in Parys was ʼn heilige oomblik. Sy het Amazing Grace gesing saam met ʼn orkes onder leiding van die Venezolaanse dirigent, Gustavo Dudamel. Die konsert het gevolg vyf jaar nadat die majestueuse katedraal in April 2019 in ʼn brand verwoes is. Yende het aan die SABC gesê sy was destyds in die Franse hoofstad toe die brand ontstaan het:

Bly ingeskakel vir meer nuus……………….