Nuus 11:00

BULLETIN 9 Desember 11 vm

Goeiemôre. Ek is……..

In die bulletin:

# President Ramaphosa sê hierdie jaar is gekenmerk deur oorwinnings sowel as worsteling
# Thabo Mbeki sê vernuwing is van kritieke belang vir die ANC se voortbestaan
# En die hoof van die Verenigde Nasies, António Guterres, vra ‘n ordelike politieke oorgang in Sirië na al-Assad se vertrek

# President Cyril Ramaphosa sê die jaar is gekenmerk deur oorwinnings en gevegte, van die suksesvolle algemene verkiesing tot die tragedie van kinders wat aan voedselvergiftiging dood is. Hy sê in sy weeklikse nuusbrief vordering is gemaak om toestande te skep vir ekonomiese groei en werkskepping, en die einde van beurtkrag. Ramaphosa sê egter swak bestuur, misdaad en toegang tot skoon water is van die probleme wat aandag moet kry. Hy voeg by vanjaar was in sommige opsigte beter as verlede jaar.

# Oudpresident Thabo Mbeki sê die vernuwingsproses in die ANC is noodsaaklik vir sy oorlewing. Hy het die ANC se Dullah Omar-streek in die Wes-Kaap toegespreek tydens ‘n bespreking oor uitdagings waarmee die ANC en die Nasionale Demokratiese Rewolusie te kampe het. Mbeki sê die party moet ernstige selfontleding doen om vas te stel of hy nog genoeg vermoë het om die land te lei:

# ActionSA in Gauteng het kommer uitgespreek oor voortgesette bevindings van ongemagtigde, onregmatige, vrugtelose en verkwistende uitgawes by die meeste departemente en instellings in die provinsie. Dertien verslae is by die staande komitee oor Openbare Rekeninge ingedien en net twee het ongekwalifiseerde menings met wesenlike bevindings ontvang. ActionSA se woordvoerder, John Moodey, sê daar is ʼn ernstige gebrek aan gevolgebestuur:

# Die sekretaris-generaal van die Verenigde Nasies, António Guterres, sê die einde van president Basjar al-Assad se diktatoriale regime beteken die mense van Sirië kan ‘n geskiedkundige geleentheid aangryp om ‘n bestendige en vreedsame toekoms te bou. Rebellemagte het verklaar dat sy regering gister geëindig het nadat hulle die hoofstad, Damaskus, ingeneem het. Al-Assad en sy gesin het na Rusland gevlug. Guterres sê dit is noodsaaklik om te verseker dat politieke oorgang almal insluit en dat dit voldoen aan die wettige behoeftes van die mense van Sirië.

# Gholf: Die wêreld-nommer-een, Scottie Scheffler, het ‘n briljante seisoen afgesluit deur sy Hero World Challenge-titel in die Bahamas suksesvol te verdedig. Die Amerikaner het ses houe voor Tom Kim van Suid-Korea geëindig met sy landgenoot Justin Thomas in die derde plek. Dit is Scheffler se negende titel van die jaar, wat die rekord ewenaar. Dit sluit die Amerikaanse Meesters en Olimpiese goud in. Hy sê dit was ‘n taamlik onwerklike jaar:

# En die finansiële aanwysers: Die rand verhandel teen 17-rand-99-sent teen die dollar, 18-rand-98-sent teen die euro en 22-rand-91-sent teen die pond. Bitcoin verhandel teen 99-duisend-230-dollar-96-sent. Die prys van goud is twee-duisend-642-dollar-8-sent per fynons en die prys van Brent-ruolie 71-dollar-49-sent per vat.

Bly ingeskakel vir meer nuus……………….