Nuus 11:00

BULLETIN  8 Desember 11 vm

Goeiemôre. Ek is……..

In die bulletin:

# Saftu verwerp die regering se vroeë aftreeplan vir staatsamptenare 
# Die polisie arresteer nog ‘n dwelmsmokkelaar op OR Tambo 
# En gholf: Aldrich Potgieter jaag sy debuutoorwinning in ‘Afrika se major’

# Saftu sê hy verwerp sonder voorbehoud die regering se plan om vroeë aftree-inisiatiewe in te stel vir staatsamptenare. Saftu-woordvoerder, Mogošadi Maserumule, sê dié kostebesparingsmaatreël, gemik op die verlaging van die staatsdiensloonrekening, bedreig dienslewering en stel die lewensbestaan van duisende werkersklas-gesinne in gevaar. Sy sê die Nasionale Tesourie het elf-miljard-rand toegeken om die program te befonds, gemik op vroeë aftrede vir nagenoeg 30-duisend werknemers:

# ‘n Drie-en-veertigjarige Paraguaanse vrou van São Paulo in Brasilië is Vrydag op die OR Tambo Internasionale Lughawe in Kemptonpark in hegtenis geneem vir beweerde dwelmsmokkelary. ‘n Woordvoerder van die polisie Amanda van Wyk sê die vrou is in ‘n plaaslike hospitaal opgeneem waar mediese X-strale vreemde voorwerpe in haar maag onthul het:

# Die prins van Wallis en die verkose Amerikaanse president Donald Trump het 40 minute lank samesprekings gehou by die woning van die Britse ambassadeur na hulle die heropening bygewoon het van die Notre-Dame-katedraal in Parys. Volgens Kensington-paleis het hulle ‘n reeks globale kwessies bespreek maar ook gepraat oor die spesiale betrekkinge tussen Brittanje en Amerika. Trump het ook warm en teer herinneringe met William gedeel oor sy ontslape ouma, koningin Elizabeth. Dit was die eerste keer dat die twee ontmoet het sedert die Amerikaner verlede maand herverkies is tot president.

# Gholf: Die 20-jarige Aldrich Potgieter staan op die rand van ‘n droomdebuut in die Nedbank Gholfuitdaging by die Gary Player-buiteklub. Die jong Suid-Afrikaner is genooi na die toernooi deur Gary Player self en het die kans gister aangegryp deur die voortou te neem op sewe onder baansyfer na ‘n brouhouvrye 66. Francesco Laporta van Italië en Matthew Jordan van Engeland is sy naaste uitdagers. Die verdedigende kampioen Max Homa slaan in die finale ronde vier houe agter voorloper af na ‘n 72.

# En te slotte, gerugte wat die rondte op sosiale media doen oor die dood van die Suid-Afrikaanse jazz-ikoon, Abdullah Ibrahim, is onwaar. Die plaaslike konsertpromotor Roddy Quin was in kontak met Ibrahim se internasionale bestuur, en hulle het bevestig dat hy wel nog lewe. Die media en die publiek word gevra om op te hou om waningligting te versprei. Die 90-jarige Ibrahim is een van Suid-Afrika se voortreflikste pianiste en ‘n wêreldgerespekteerde meestermusikant.

Bly ingeskakel vir meer nuus……………….