Nuus 11:00
BULLETIN 7 Desember 11 vm
Goeiemôre. Ek is……..
In die bulletin:
# Eskom sê sy herstelplan loop uit op dieselbesparing van byna 17-miljard-rand
# Die ANC-jeugliga veroordeel die regering se besluit om Waluś te laat ontsnap uit Suid-Afrika
# En, atletiek: ‘n Sestienjarige Australiese sensasie hardloop die vierde vinnigste onder-18 100-meter van alle tye
# Eskom sê die herstelplan het uitgeloop op jaar-tot-jaar dieselbesparings van 16,99-miljard-rand, wat ongeveer 70-persent minder is as die 24,27-miljard-rand wat verlede jaar oor dieselfde tydperk bestee is. Daphne Mokwena van Eskom sê die kragnutsmaatskappy se strategiese gebruik van piekstasies, waaronder gepompde berging en oop-siklusgasturbines, is steeds die sleutel tot die bestuur van die vraag na elektrisiteit in piektye, veral in die namiddag en aand van vyf tot tien:
# Die ANC-jeugliga veroordeel die regering se besluit om Chris Hani se moordenaar Janusz Waluś toe te laat om uit Suid-Afrika te ontsnap en die volle gevolge van sy optrede te vermy. Die liga sê Waluś se midaad is op Suid-Afrikaanse grond gepleeg, en hy moet in die land die gereg in die gesig staar. Hulle sê as die regering steeds nie optree nie, moet die mense van Suid-Afrika sake in hulle eie hande neem. Die party sê hy moet aan die mense van Suid-Afrika oorhandig word om oor sy lot te besluit.
# Die Stad Kaapstad het gister toegeslaan op ‘n verlate gebou in Dunoon na ‘n wenk oor ‘n onwettige drankvervaardiging in die gebied. Hulle het afgekom op verskeie vol, geseëlde bottels wat voorgehou is as whisky en jenewer. Die burgemeesterskomiteelid vir Veiligheid en Sekerheid, JP Smith, sê geen verdagtes is op die toneel aangetref nie en ‘n ondersoekdossier is by die polisie ingedien:
# TikTok se poging om ‘n wet om te keer wat die toepassing van vroeg 2025 af in Amerika sal verbied of verkoop laat word is van die hand gewys. Die sosiale mediamaatskappy het gehoop ‘n federale appèlhof sou instem die wet is ongrondwetlik omdat dit ‘n verstommende uitwerking op vryheid van spraak vir sy 170-miljoen gebruikers in die VSA sou beteken. Amerika wil hê TikTok moet verkoop of verbied word oor wat hy beskryf as die eienaars se bande met China.
# En, atletiek: Die Australiese tiener-naelloopsensasie, Gout Gout, het by ‘n kampioenskap vir hoërskole in Queensland die vierde vinnigste tyd ooit in die 100 meter vir onder-18’s aangeteken met ‘n tyd van 10,04 sekondes. Dit was met die wind van agter maar hy het later ʼn geldige 10,17 in die eindronde aangeteken om sy persoonlike beste tyd en die vorige Australiese onder-18-rekord te verbeter. Gout het in 2022 op die toneel verskyn toe hy as 14-jarige die 100-meter in 10,57-sekondes afgelê het. Hy word die afgelope twee jaar met die naellooplegende, Usain Bolt, vergelyk.
Bly ingeskakel vir meer nuus……………….