Nuus 11:00

BULLETIN 2 Desember 11 vm

Goeiemôre. Ek is……..

In die bulletin:

# President Ramaphosa reageer op Donald Trump se dreigemente

# Die SAKP sê die regering van nasionale eenheid sal nie vyf jaar hou nie

# En vyf vermeende OTM-rowers word doodgeskiet en een gewond in Mpumalanga

# President Cyril Ramaphosa sê Suid-Afrika sal die tussenganger wees in diplomatieke samesprekings met die verkose Amerikaanse president, Donald Trump, eerder as om betrokke te raak by botsings op sosiale media oor bilaterale kwessies. Dit volg nadat Trump gedreig het om 100-persent tariewe in te stel vir BRICS-lande as hulle ‘n mededingende wisselkoers vir die Amerikaanse dollar sou skep. BRICS bestaan sedert 2011 uit Brasilië, Rusland, Indië en Suid-Afrika. Iran, die Verenigde Arabiese Emirate, Ethiopië en Egipte het vroeër vanjaar formeel aangesluit. Ramaphosa sê deur die presidentskap van die G20 sal Suid-Afrika nou saamwerk met die VSA.

# Die SAKP se hoofsekretaris, Solly Mapaila, sê hy glo nie die regering van nasionale eenheid gaan vyf jaar hou nie. Die SAKP is die ANC se alliansievennoot en is gekant teen die regering van nasionale eenheid, en veral die DA se insluiting daarby. Mapaila het aan eNCA gesê volgens hom gaan die DA voort met politiek en beleid teen die werkersklas, soos sy teenstand teen die minimumloon, die BELA-wet en die Nasionale Gesondheidsversekering:

# Vyf vermeende kitsbank-bomplanters is vanoggend deur die polisie doodgeskiet in Emalahleni, Mpumalanga. Nog ‘n verdagte is gewond. Polisiewoordvoerder Katlego Mogale sê ‘n multidissiplinêre span is strategies geplaas in Schoongezicht om op die uitkyk te wees vir ‘n wit Toyota Hilux. Sy sê die uitgekende voertuig is opgemerk toe dit uit die gebied beweeg, en toe die span dit probeer voorkeer, het ‘n skietgeveg uitgebreek:

# Motorsport: Die sewemalige Formule Een-wêreldkampioen, Lewis Hamilton, sê die teleurstellende wyse waarop hy sy loopbaan by Mercedes beëindig, som nie hulle verhouding van 12-jaar op nie. Die Britse jaer het hom die naweek twee strafpunte op die hals gehaal en 12de geëindig in die Katarse Grand Prix. Hy sluit volgende seisoen by Ferrari aan. Hamilton sê hy sal alles uithaal in die naweek se laaste wedren in Abu Dhabi:

# Die finansiële aanwysers: Die rand verhandel teen 18-rand-14-sent teen die dollar, 19-rand-9-sent teen die euro en 23-rand-3-sent teen die pond. Bitcoin verhandel teen 96-duisend-431-dollars-33-sent. Die prys van goud is twee-duisend-627-dollar-14-sent per fynons en die prys van Brent-ruolie is 72-dollar-51-sent per vat.

# En ten slotte: Londen, bekend vir sy wêreldberoemde museums en naglewe, is die tiende agtereenvolgende jaar bekroon as die beste stad ter wêreld. Die Wêreld se Beste Stede-verslag vir 2025 het ‘n peiling gedoen onder meer as 22-persent van mense in 30 lande om die 270 grootste wêreldstede op ‘n ranglys te plaas. Volgens die verslag maak Londen se veerkragtige gees en globale aantreklikheid hom steeds ‘n aanloklike stad. New York is tweede op die lys, gevolg deur Parys, Tokio, en Singapoer. Kaapstad is 85ste.

Bly ingeskakel vir meer nuus……………….