Nuus 11:00

BULLETIN 30 November 11 vm

Goeiemôre. Ek is……..

In die bulletin:

# Jacob Zuma stel Thanti Mthanti aan as MK-party se tesourier-generaal
# Beurtkrag nou reeds vir agt maande opgeskort
# Motorsport: Charles Leclerc van Ferrari is vroeë pasaangeër by Katar Grand Prix

# Die leier van die MK-party Jacob Zuma het Thanti Mthanti aangewys as die party se tesourier-generaal. Hy volg Menzi Magubane op. Zuma sê in ‘n verklaring Mthanti, wat lank reeds ‘n lid is van die nasionale opperbevel, en die voorsitter van die subkomitee oor kommunikasie, sal die pligte uitoefen soos bepaal deur die party se grondwet. Zuma het ook Nhlamulo Ndhlela aangestel as die voltydse nasionale woordvoerder, wat hom deel maak van die top-agtleierskap. Zuma beklemtoon Ndhlela se rol in die versterking van die party se kommunikasiestrategie en oorhoofse rigting.

# Eskom het bevestig sy herstelplan het gesorg dat beurtkrag nou opgeskort is vir 247 agtereenvolgende dae sedert 26 Maart. Die woordvoerder Daphne Mokoena sê strukturele verbeterings in die steenkoolaangedrewe vloot het jaar-tot-jaar uitgeloop op dieselbesparings van byna 18-miljard-rand, wat ‘n vermindering van 71-persent is. Sy sê met energiebeskikbaarheid nou op 63-persent, verwag Eskom ‘n beurtkragvrye somer weens die versterking van die kragnetwerk:

# Die Mangosuthu Universiteit vir Tegnologie bied die 2024 WIPO-SA-somerskool aan oor intellektuele eiendom en tegnologie-oordrag. Die program, wat duur tot 6 Desember, bring globale en Afrika-deelnemers byeen en rus hulle toe as beroepslui met vaardighede om iets te doen aan Afrika se vernuwingsgapings. Die adjunk-direkteur van die universiteit, Mandla Hlongwane, beklemtoon die inisiatief se rol in die stimulering van volhoubare ontwikkeling en ekonomiese groei deur intellektuele eiendoms-opvoeding. Die program word aangebied in vennootskap met die Departement van Wetenskap, Tegnologie en Innovering.

# Die Wêreldvoedselprogram het die eerste besendings kos afgelewer by die Zamzam-vlugtelingkamp in die Darfoerstreek van Soedan. Die woordvoerder Leni Kinzli het aan Newzroom Afrika gesê 17-duisend-500-ton voedsel word afgelewer by 14 kritieke brandpunte in die hongersnoodgeteisterde Soedan. Sy sê ongeveer 4,7-miljoen kinders onder vyf, asook vroue wat borsvoed en swanger is, gaan gebuk onder aktute wanvoeding:

# En motorsport: Charles Leclerc het gewys Ferrari het die potensiaal om McLaren se eerste vervaardigerstitel in 26 jaar in die wiele te ry toe hy beter gevaar het as Lando Norris in gister se eerste oefenrondes van die Katar Grand Prix. Norris se spanmaat, Oscar Piastri was die derde vinnigste. Carlos Sainz was vierde in die tweede Ferrari. Die nuutgekroonde viermalige wêreldkampioen, Max Verstappen, was maar 11de, met Red Bull wat sukkel om by te hou en hulle sal alles in die stryd moet werp om hulle spantitel die naweek te behou.

Bly ingeskakel vir meer nuus……………….