Nuus 11:00

BULLETIN 29 November 11 vm

Goeiemôre. Ek is……..

In die bulletin:

# Die Instituut vir Rasseverhoudinge sê Suid-Afrika benodig ‘n geskikte beleids- en bestuursraamwerk
# Die ANC-Jeugliga sê president Ramaphosa is hier om te bly
# En, Namibië verleng die stemmery by sommige stemlokale

# Die Instituut vir Rasseverhoudinge sê Suid-Afrika kan ‘n aantreklike beleggingsbestemming word, indien ‘n geskikte beleids- en bestuursraamwerk ingestel word. Die instituut het die week sy jongste verslag met die titel Open for Business: South Africa’s investment malaise and how to escape it, bekendgestel. Terence Corrigan van die IRV sê deur verwaarlosing en doelbewuste beleidskeuses het Suid-Afrika ‘n omgewing geskep wat onaantreklik vir beleggings is:

# Die president van die ANC-Jeugliga, Collen Malatji, sê die EFF en ATM mors hulle tyd met pogings om parlementêre prosesse te laat herleef vir die verwydering van president Cyril Ramaphosa. Dit volg nadat die partye vroeër die week die Konstitusionele Hof genader het om die Nasionale Vergadering se besluit uit te daag om nie die Artikel 89-verslag oor die Phala Phala-skandaal te aanvaar nie. Malatji sê die EFF en die ATM probeer om Phala Phala en die naam van die president te gebruik om hulle tersaaklikheid te laat herleef. Hy voeg by hulle wil verseker Ramaphosa voltooi sy tweede termyn.

# Die Gautengse Departement van Gemeenskapsveiligheid waarsku ouers en voogde om leerders te ontmoedig om die naweek partytjies by te woon om die einde van die matriekeksamen te vier. Dit volg ná die tragiese voorval in die Enyobeni-taverne in die Oos-Kaap in Junie 2022 toe 21 tieners dood is terwyl hulle die einde van die Junie-eksamen gevier het. Die departement se woordvoerder, Ofentse Morwane, sê matriekleerders is opgewonde omdat die eksamen verby is, maar die partytjies kan gevaar inhou omdat minderjariges alkohol gebruik en onverskillig optree:

# Die Namibiese Verkiesingskommissie sê stemmery sal vandag en môre by aangewese stemlokale voortgaan. Woensdag se stemdag is ontsier deur logistieke probleme soos ‘n tekort aan stembriewe en lang toue. Die kommissie sê die stemtellery sal voortgaan en die geïdentifiseerde stemlokale se stembriewe sal apart hanteer en getel word. Die uitvoerende direkteur van die Instituut vir Openbare Beleidsnavorsing, Graham Hopwood, sê die Verkiesingskommissie erken dat sommige kiesers nie kon stem nie:

# Krieket: Harry Brook se sewende toets-honderdtal het Engeland gered en hulle het die tweede dag van die eerste toets teen Nieu-Seeland in Christchurch afgesluit op 319 vir vyf. Brook en Ollie Pope het ŉ vennootskap van 151 om die vyfde paaltjie aangeteken nadat Engeland gesukkel het op 71 vir vier na Nieu-Seeland se 348. Joe Root is in sy 150ste toetswedstryd uit vir ŉ nulletjie. Brook, onoorwonne op 132, gaan môre probeer voortbou op sy vennootskap van 97-lopies met kaptein Ben Stokes. Engeland is tans 29-lopies agter.

# En die finansiële aanwysers: Die rand verhandel teen 18-rand-4-sent teen die dollar, 19-rand-8-sent teen die euro en 22-rand-95-sent teen die pond. Bitcoin verhandel teen 96-duisend-423-dollar. Die prys van goud is twee-duisend-661-dollar-98-sent per fynons en die prys van Brent-ruolie 72-dollar-51-sent per vat.

Bly ingeskakel vir meer nuus……………….