Nuus 11:00

BULLETIN 27 November 11 vm

Goeiemôre. Ek is……..

In die bulletin:

# Eskom sê die hoër kredietgradering steun sy vordering

# Die Israelse Weermag waarsku ontheemde Libanese inwoners om nie terug te keer huis toe nie

# En Olimpiese Spele: Indië toon ook belangstelling om 2036 se Spele aan te bied

# Eskom sê S&P Global se opgradering van sy kredietgradering van bestendig na positief is ‘n duidelike aanduiding van die vordering wat hy maak met die versterking van sy finansiële en operasionale grondslag. Die kragverskaffer sê die besluit toon S&P Global se vertroue in die uitwerking van die finansiële steunpakket van 254-miljard-rand kragtens die Wet op Skuldverligting. Eskom se uitvoerende hoof, Dan Marokane, sê hulle sal steeds fokus op die instelling van opwekkingsherstel, die versterking van bestuur en die teenwerk van misdaad en korrupsie, terwyl hulle die organisasie toekomsgereed maak ter wille van energiesekerheid.

# Die Vryemarkstigting vra die regering om dringend ŉ breë agenda met gesonde geldhervorming te aanvaar om dekades van ekonomiese verval om te keer en vooruitgang te herstel. Dit stigting het onlangs sy jongste beleidsdokument bekendgestel wat beleidsaanbevelings en voorgestelde hervormings bevat om finansies in Suid-Afrika te versterk. Die stigting se uitvoerende hoof, David Ansara, sê dis belangrik om die oneweredige uitwerking van inflasie op Suid-Afrika se armste gemeenskappe aan te pak:

# Die Wes-Kaapse LUR vir Onderwys, David Maynier, waarsku matrieks om die einde van hulle skoolloopbaan veilig en met verantwoordelikheid te vier. Die laaste matriekvraestelle, Landboubestuurspraktyke, Mariene Wetenskappe Vraestel 2 en Ontwerp Vraestel 1, word vandag geskryf en trek die streep onder die eksamen van vyf weke. Maynier sê matrieks wat die eksamen se einde met partytjies vier, moet vir hulle veiligheid ŉ buddy-stelsel kry en gereeld kontak maak met hul ouers:

# Die Israelse Weermag het inwoners wat ontheem is deur die gevegte en ontruimingsbevele, gemaan om nie na hulle huise in die suide van Libanon terug te keer nie. Dit is ondanks ‘n skietstilstand van 60-dae tussen Israel en Hizbollah wat vanoggend van krag geword het. Dit bepaal die Israelse Weermag moet heeltemal aan die suide van Libanon onttrek. Intussen sê die sekretaris-generaal van die Verenigde Nasies, António Guterres, hy hoop die skietstilstandooreenkoms kan ‘n einde maak aan die geweld, verwoesting en lyding van die mense van albei lande.

# Olimpiese Spele: Indië stel ook daarin belang om die Olimpiese Spele in 2036 aan te bied. Dit volg na die nuus dat ŉ uitvoerbaarheidstudie onder leiding van die Internasionale Olimpiese Komitee sal bepaal of Suid-Afrika gereed is om ŉ bod voor te lê. Die president van Wêreldatletiek, Sebastian Coe, wat ŉ kandidaat is om president te word van die IOK, sê hy is verheug oor Indië se aankondiging. Hy waarsku die land egter om die Spele te organiseer is een van die ingewikkeldste projekte ter wêreld.

# En die finansiële aanwysers: Die rand verhandel teen 18-rand-12-sent teen die dollar, 19-rand-1 teen die euro en 22-rand-80-sent teen die pond. Bitcoin verhandel teen 93-duisend-30-dollars-67-sent. Die prys van goud is twee-duisend-644-dollar-20-sent per fynons en die prys van Brent-ruolie is 72-dollar-88-sent per vat.

Bly ingeskakel vir meer nuus……………….