Nuus 11:00

BULLETIN 22 November 11 vm

Goeiemôre. Ek is……..

In die bulletin:

# ‘n Ekonoom waarsku oor die gevare vir Suid-Afrika se ekonomiese vooruitsigte
# Netanyahu sê die Internasionale Strafhof is polities bevooroordeeld
# En Yvonne Chaka Chaka ontvang ‘n spesiale toekenning

# ‘n Ekonoom aan die Stellenbosse Bestuurskool, André Roux, waarsku stygende elektrisiteitspryse en ‘n swakker rand kan Suid-Afrika se ekonomie knou en inflasie verhoog. Dit volg nadat die Reserwebank se Monetêre Beleidskomitee die terugkoopkoers met 25 basispunte verlaag het, van agt-persent tot 7,75-persent, geldig vanaf vandag. Roux beveel ‘n versigtige benadering tot ekonomiese beleid aan om verdere verswakking te verhoed:

# Openbare Beskermer Kholeka Gcaleka sê die polisie ondersoek dreigemente teen die uitvoerende hoof van die Hoofstuk 9-instelling, Thandi Sibanyoni. Dit hou verband met die gratifikasie van tien-miljoen rand wat die vorige Openbare Beskermer, Busisiwe Mkhwebane, beweer haar toekom. Gcaleka het verlede maand aan die Parlement gesê Mkhwebane se man, David Skosana, het dreigoproepe na haar gemaak en boodskappe aan Sibanyoni gestuur. Sy sê daar was ook ‘n boodskap van ‘n onbekende nommer waarin Sibanyoni se seuns gedreig word indien Mkhwebane nie haar geld ontvang nie.

# Die Israelse eerste minister, Benjamin Netanyahu, sê die Internasionale Strafhof is ‘n polities-bevooroordeelde en diskriminerende liggaam. Dit volg na die hof ‘n lasbrief vir die inhegtenisneming van Netanyahu, sy voormalige minister van verdediging, Yoav Gallant, en Hamas se militêre leier, Mohammed Deif, uitgereik het. Die hof beskuldig hulle van oorlogsmisdade en misdade teen die mensdom. Netanyahu sê hy sal nie terugstaan tot al die doelwitte teen Hamas bereik is nie:

# Rugby: Die veterane Sam Cane en TJ Perenara speel môreaand hulle laaste toets vir die All Blacks in La Nucia teen Italië. Cane, die gewese kaptein wat in 103 toetse vir Nieu-Seeland gespeel het, sal die nommer 7-trui dra, en die skrumskakel Perenara sal sy 89ste toets op die bank begin. Albei gaan volgende jaar in Japan speel en is dan nie vir die nasionale span verkiesbaar nie. Hoofafrigter Scott Robertson het vyf veranderings aangebring aan die span wat verlede naweek naelskraaps teen Frankryk verloor het.

# Die finansiële aanwysers: Die rand verhandel teen 18-rand-13-sent teen die dollar, 18-rand-97-sent teen die euro en 22-rand-76-sent teen die pond. Bitcoin verhandel teen 99-duisend-86-dollar-52-sent. Die prys van goud is twee-duisend-690-dollar-77-sent per fynons en die prys van Brent-ruolie 73-dollar-79-sent per vat.

# En ter afsluiting: Die Amy-stigting hou môreaand sy jaarlikse galadinee en veiling in die Century City-konferensiesentrum in Kaapstad. Die legendariese musikant, Yvonne Chaka Chaka, sal met die stigting se Ubuntu-toekenning bekroon word, uit erkenning van haar buitengewone bydraes tot maatskaplike opheffing en haar beliggaming van deernis en gemeenskapsgees. Die stigting beoog vanjaar om ‘n miljoen-rand deur die veiling in te samel. Die stigting betrek jaarliks ​​meer as tweeduisend begunstigdes deur sy vernuwende Naskoolse- en Jeugvaardigheidsontwikkelingsprogramme.

Bly ingeskakel vir meer nuus……………….