Nuus 11:00

BULLETIN 18 November 11 vm

Goeiemôre. Ek is……..

In die bulletin:

# Die SAKP kyk na sy politieke onafhanklikheid
# Cosatu is bekommerd oor die toestand van plaaslike regering
# En ‘n Aboriginee-senator is onder sensuur geplaas omdat sy koning Charles uitgejou het

# Die SAKP gaan sy vyfde spesiale nasionale kongres volgende maand gebruik om sy verhouding oor tientalle jare met die ANC te hersien. Die drie-party-alliansie se verhouding is gespanne na die ANC se besluit om die DA by die regering van nasionale eenheid in te sluit. Die SAKP sê in sy konferensiebesprekingsdokument sy identiteit as ‘n onafhanklike politieke instelling het verswak en hy word al meer as ‘n uitbreiding van die ANC gesien. Hy sê die nasionale verkiesingsuitslae het vrae oor die alliansie se doeltreffendheid laat toeneem.

# Cosatu sê dringende ingryping en ‘n nuwe befondsingsmodel is nodig om plaaslike owerhede te stabiliseer en te herbou. Die vakbondfederasie het verlede week sy voorlegging in die Parlement oor die Mediumtermynbegrotingsraamwerk se Wysigingswetsontwerp op Inkomste ingedien. Die wetsontwerp dek aanpassings in begrotingstoewysings aan provinsiale en plaaslike regerings vir die 2024/’25-boekjaar. Matthew Parks van Cosatu sê die stand van plaaslike regerings is uiters kommerwekkend:

# Die DA in Gauteng sê meer as 16-duisend-240 formele voedselverskaffingsinstellings in die provinsie voldoen sedert 2020 nie aan voedselveiligheidsregulasies nie. Die provinsie het meer as 400 gevalle van voedselvergiftiging en 23 sterftes aangemeld – die meeste kinders. Die DA sê gegewe die groot aantal formele instellings wat nie aan regulasies voldoen nie, is dit duidelik dat daar ‘n behoefte aan meer gesondheidsinspekteurs in Gauteng is. Hy sê die gebrek aan inspekteurs stel mense se lewens in gevaar.

# Australiese wetgewers het ‘n Aboriginee-senator, Lidia Thorpe, oor die kole gehaal nadat sy koning Charles verlede maand uitgejou het tydens sy besoek aan Canberra. Sy het die verwelkoming onderbreek deur uit te roep: “Jy’t volksmoord teen ons mense gepleeg” en “Jy’s nie ons koning nie”. ʼn Mosie van sensuur dra geen grondwetlike of wetlike gesag nie. Die senaat het die mosie met 46 teen 12 stemme aanvaar en haar gedrag as ontwrigtend beskryf. Thorpe sê sy is nie spyt nie:

# Rugby: Wallis se afrigter, Warren Gatland, sê hy sal nou oor sy toekoms besin nadat sy span sy elfde agtereenvolgende toets verloor het. Australië het Wallis gister in Cardiff met 52-20 afgeransel. Gatland het ná die wedstryd met die Walliese Rugby-unie se voorsitter, Richard Collier-Keywood, en die uitvoerende direkteur van rugby, Nigel Walker, vergader. Wallis takel Saterdag die wêreldkampioen, Suid-Afrika. Gatland sê dis die uitdagendste tyd wat hy nog as afrigter beleef het:

# En die finansiële aanwysers: Die rand verhandel teen 18-rand-8-sent teen die dollar, 19-rand-7-sent teen die euro en 22-rand-86-sent teen die pond. Bitcoin verhandel teen 91-duisend-586-dollar. Die prys van goud is twee-duisend-584-dollar-57-sent per fynons en die prys van Brent-ruolie 71-dollar-1-sent per vat.

Bly ingeskakel vir meer nuus……………….