Nuus 09:00

BULLETIN 31 Julie 9 vm

Goeiemôre. Ek is……..

In die bulletin:

# Zimbabwe bestee meer as 79-miljoen-rand aan terugkerende landsburgers
# Die ANC vesoek Suid-Afrikaners om die naweek te registreer om te stem
# En Hamas het ingestem om heeltemal te ontwapen in Gaza

# Zimbabwe se minister van Finansies en Ekonomiese Ontwikkeling, professor Mthuli Ncube, sê die regering het sowat 79,2-miljoen-rand bestee aan die repatriasie en herinskakeling van landsburgers wat uit Suid-Afrika terugkeer. Meer as 36-duisend Zimbabwiese burgers het deur regeringsondersteunde reëlings, en byna 80-duisend het op hul eie na Zimbabwe teruggekeer. Ncube sê die geld dek vervoer, tydelike verblyf, voedselhulp en mediese dienste in:

# Die ANC het alle Suid-Afrikaners wat nog nie as kiesers geregistreer het nie, aangemoedig om dit môre en Sondag tydens die tweede en laaste kieser-registrasienaweek te doen. Dit is aanloop tot die munisipale verkiesing in November. Meer as drie-miljoen registrasies is tydens die eerste kieser-registrasienaweek op 20 en 21 Junie aangeteken. Die waarnemende ANC-woordvoerder, Nonceba Mhlauli, sê die Verkiesingskommissie se registrasieveldtog is belangrik om ‘n vrye en regverdige verkiesing te verseker:

# Die burgemeester van Kaapstad, Geordin Hill-Lewis, sê die metro se kapitale uitgawes van meer as 12,2-miljard-rand vir die 2025/2026-boekjaar is nie net ‘n rekord-infrastruktuurbelegging vir Kaapstad nie, maar ‘n Suid-Afrikaanse rekord vir ‘n stad in ‘n enkele jaar. Nagenoeg 75-persent van die metro se infrastruktuurbelegging hou ‘n regstreekse voordeel in vir laerinkomste-huishoudings. Hill-Lewis sê hoogtepunte oor die volgende drie jaar sluit in 16,7-miljard-rand vir water en sanitasie, ses-miljard-rand vir opgraderings en instandhouding van die elektrisiteitsnetwerk, en 3,3-miljard-rand vir die verbetering van informele nedersettings:

# Die militante groep, Hamas, sê hy het ingestem tot die Vredesraad se plan dat hy in Gaza ontwapen word. President Donald Trump van Amerika beskryf die ooreenkoms as ŉ belangrike mylpaal wat betref sy 20-punt vredesplan om die oorlog in Gaza te beëindig. Die plan van vier bladsye sit ŉ gefasseerde proses uiteen wat Hamas se ontwapening verbind aan Israelse magte se geleidelike onttrekking, en die ontplooiing van ŉ nuwe Palestynse oorgangsowerheid wat deur ŉ internasionale stabiliseringsmag ondersteun word. Hamas waarsku as Israel nie die ooreenkoms instel nie, sal hy ook nie.

# Sokker: Die Europese beheerliggaam UEFA se 55 lede het eenparig gestem om die Wêreldbeker en ander FIFA-kompetisies te boikot indien die sport se beheerliggaam voortgaan met sy omstrede verkoopsplan. FIFA-president Gianni Infantino wil ‘n filiaal ter waarde van ongeveer 334,46-miljard-rand stig en meer as 20-persent van die nuwe FIFA Forward Enterprise verkoop en vanjaar na raming 70,35-miljard-rand insamel. Concacaf, wat die sport in Noord- en Sentraal-Amerika beheer en vanjaar se Wêreldbeker aangebied het, sê sy 41 lede het ook die voorstel verwerp.

# En die finansiële aanwysers: Die rand verhandel teen 16-rand-49-sent teen die dollar, 18-rand-99-sent teen die euro en 22-rand-18-sent teen die pond. Bitcoin verhandel teen 64-duisend-210-dollar. Die prys van goud is vier-duisend-78-dollar-8-sent per fynons en die prys van Brent ruolie 90-dollar-6-sent per vat.

Bly ingeskakel vir meer nuus……………….