Nuus 09:00

BULLETIN 15 Maart 9 vm

Goeiemôre. Ek is……..

In die bulletin:

# Paul Mashatile gedenk Mosiuoa Lekota se nalatenskap tydens Menseregtemaand
# Minstens 80 dood en vele meer vermis na dodelike grondstortings in Ethiopië
# En rugby: Stormers beëindig sy reeks VRK-nederlae met ‘n oorwinning teen die Bulle op Loftus

# Adjunkpresident Paul Mashatile sê die voormalige minister van Verdediging, Mosiuoa Lekota, was deurentyd toegewy aan die ideale van die Vryheidsmanifes, gelei deur eenheid, gelykheid en ‘n gedeelde lojaliteit. Mashatile sê Lekota het geglo dat demokrasie floreer wanneer diversiteit van denke gerespekteer word. Hy voeg by Lekota se dood tydens Menseregtemaand behoort tot besinning te lei oor die vraag of Suid-Afrika die belofte van sy Grondwet nagekom het, veral in die lig van werkloosheid, geslagsgeweld en ongelykheid:

# Oudpresident Thabo Mbeki sê beginselvaste, bestendige leierskap is noodsaaklik om ekonomiese momentum te handhaaf. Mbeki se standpunt volg nadat hy Suid-Afrika se ekonomiese verlangsaming na 2008 toegeskryf het aan die politieke leierskapsoorgang na hom. Mbeki sê beleidsonsekerheid en ontwrigting in die regering na sy vertrek het beleggersvertroue ondermyn en groei vertraag, wat bydra tot voortgesette ekonomiese uitdagings. Hy het gewaarsku dat skielike politieke skuiwe langtermyn finansiële gevolge vir die nasie kan hê.

# Die Forum for South Africa het gewaarsku dat stygende elektrisiteitspryse misdaad, werkloosheid en ekonomiese agteruitgang kan aanwakker. Woordvoerder Tebogo Mashilompane sê tariewe styg ver bo inflasie, wat druk op arm en werkersklashuishoudings plaas. Hy waarsku dat onbekostigbare elektrisiteit onwettige verbindings en misdaad kan aanwakker, aangesien sakeondernemings en plase werksgeleenthede kan sny namate energiekoste styg, wat die brose ekonomie verder belas:

# Drie dae van rou is in Ethiopië afgekondig nadat 80 mense dood is in grondstortings wat deur swaar oorstromings veroorsaak is. Baie word steeds vermis nadat swaar reën die land vroeër vandeesweek getref het. Volgens die Ethiopiese Menseregtekommissie is byna drie-duisend-500 mense deur die grondstortings ontheem. Swaar reën het lande regoor Oos-Afrika die afgelope dae geteister. Daar word voorspel dat die streek meer reën sal sien en regerings het inwoners gewaarsku om versigtig te wees. Klimaatkenners het voorspel dat die reënseisoen ‘n 45-persent-kans het op bogemiddelde reënval in die meeste lande in die streek.

# Rugby: Die Stormers het na drie agtereenvolgende nederlae hul Verenigde Rugbykampioenskap-derby teen die Bulle op Loftus Versfeld gewen. Hulle het die Bulle met 32-19 getroef na hulle teen rustyd met 10-7 voor was. Die Bulle se punte het gekom van drieë deur Zak Burger, Kurt-Lee Arendse en ‘n strafdoel, met ‘n doelskop deur Handre Pollard. Benewens ‘n strafdoel het Damian Willemse, Paul de Villiers en Hacjivah Dayimani drieë vir die Stormers gedruk, terwyl Sacha Feinberg-Mngomezulu twee doelskoppe en twee strafskoppe bygevoeg het. Die Kaapse span is nou vierde op die VRK-punteleer.

# En ten slotte: Die Suid-Afrikaanse Weerdiens het verskeie waarskuwings vir ongure weer vir vandag regoor Suid-Afrika uitgereik. ‘n Geel vlak 2-waarskuwing vir swaar reën is uitgereik vir dele van Limpopo en Mpumalanga, wat die risiko van oorstromings plek-plek verhoog. Intussen word uiters warm toestande in die Wes-Kaap en die Noord-Kaap verwag, met verhoogde brandgevaar in die weste. Weervoorspellers het inwoners gemaan om versigtig te bly aangesien erge weerstoestande verskeie streke raak.

Bly ingeskakel vir meer nuus……………….