Nuus 09:00

BULLETIN 27 Augustus 9 vm

Goeiemôre. Ek is……..

In die bulletin:

# Die GOOD-party is bekommerd oor die regering se gebrek aan optrede na die VSA se befondsingsbesnoeiing
# Die Australiese polisie soek na ‘n verdagte wat twee polisiebeamptes vermoor het
# En motorsport: Cadillac bevestig Perez en Bottas as sy jaers in sy F1-debuut

# Die GOOD-party sê drie maande is verby sedert Amerika mediese befondsing aan die land gestaak het, maar die regering het nog geen teenmaatreëls aangekondig nie. Twaalf fasiliteite in Suid-Afrika is ná die besnoeiings gesluit. Dit sluit klinieke vir MIV en vigs-pasiënte in, asook antiretrovirale fasiliteite. GOOD se nasionale jeugvoorsitter, Kaden Arguile, sê die werklikheid is dat die kwesbaarste in die samelewing die ergste deur die besnoeiings geraak word:

# Die parlementêre portefeuljekomitee oor Polisie sê Statistiek Suid-Afrika se 2024/2025-opname oor bestuur, openbare veiligheid en justisie beklemtoon die kommerwekkende en inherente gebrek aan vertroue tussen die polisie en die breër gemeenskap. Volgens die opname is huisbrake die misdaad wat die meeste voorkom. Sowat 132-duisend individue het die afgelope vyf jaar onder seksuele oortredings deurgeloop wat ‘n toename van 13,8-persent is. Die komiteevoorsitter, Ian Cameron, sê die SAPD moet die statistieke gebruik om hul pogings te verbeter en ʼn data-gedrewe benadering tot polisiëring aanvaar. 

# Die Oos-Kaapse regering het begin om slagoffers van oorstromings in Mthatha in tydelike wooneenhede by die Maydene plaas te hervestig. Die oorstromings in Junie het die lewens van meer as 100 mense geëis en duisende is dakloos gelaat. Die woordvoerder van die provinsiale regering, Khuselwa Rantjie, sê 25 families is hervestig en meer sal geskuif word sodra meer tydelike eenhede beskikbaar is om in te trek:

# Die polisie in Australië soek na ʼn swaar gewapende man wat gister in Porepunkah, Victoria, drie polisiebeamptes geskiet het. Twee van die slagoffers is dood. Die verdagte is geïdentifiseer as die 56-jarige Dezi Freeman. Daar is op tien polisiebeamptes gevuur toe hulle na Freeman se eiendom gegaan het met ʼn lasbrief vir inhegtenisneming weens vermeende seksuele oortredings. Victoria se hoof-polisiekommissaris, Mike Bush, sê die soektog fokus op ʼn beboste gebied naby Freeman se huis:

# Motorsport: Sergio Perez van Mexiko en Valtteri Bottas van Finland keer volgende jaar terug na Formule Een nadat hulle bevestig is as die bestuurders vir die nuwe Caddilac span. Perez het sy plek in die Red Bull-span verlede jaar verloor terwyl Bottas die reserwe-bestuurder is vir sy voormalige span, Mercedes, nadat hy sy plek by die Sauber-span verloor het. Albei het meerjarige kontrakte gesluit met Cadillac, wat deur General Motors ondersteun word. Die span het gerugte verwerp dat Christian Horner, die Red Bull uitvoerende hoof wat afgedank is, in ‘n bestuursrol aangestel gaan word.

# En die finansiële aanwysers: Die rand verhandel teen 17-rand-63-sent teen die dollar, 20-rand-48-sent teen die euro en 23-rand-72-sent teen die pond. Bitcoin verhandel teen 111-duisend-462-dollar. Die prys van goud is drie-duisend-377-dollar-67-sent per fynons en die prys van Brent ruolie 66-dollar-67-sent per vat.

Bly ingeskakel vir meer nuus……………….