Nuus 09:00

BULLETIN 3 Desember 9 vm

Goeiemôre. Ek is……..

In die bulletin:

# President Ramaphosa sê die land het vordering gemaak met die regte van persone met gestremdhede
# Gauteng se munisipaliteite verwerp gesamentlik Eskom se voorgestelde tariefverhoging
# En die Wêreldvoedselprogram brei sy bedrywighede in Haïti uit

# President Cyril Ramaphosa sê dis vandag Internasionale Dag van Persone met Gestremdhede wat geleentheid bied om na te dink oor vordering met gestremde persone se regte. Sowat 3,3-miljoen mense in Suid-Afrika leef met ‘n vorm van fisiese of intellektuele gestremdheid. Die president sê in sy weeklikse nuusbrief hoewel vordering gemaak is met wetgewende en beleidsraamwerke, moet die hele gemeenskap saamwerk om hierdie regte te laat realiseer. Ramaphosa sê gestremde persone moet gelyke regte hê.

# Die DA versoek die minister van Elektrisiteit, Kgosientsho Ramokgopa, om voorrang te gee aan privaat sektor-gedrewe energieopwekking eerder as die besteding van 90-miljard-raand aan die uitbreiding van steenkoolaanlegte. DA-woordvoerder, Kevin Mileham, wys op inisiatiewe met hernubare energie en battery-opberging as bekostigbare alternatiewe om die netwerk te bestendig. Mileham waarsku teen die finansiële en omgewingsgevolge indien die leeftyd van steenkoolaanlegte verleng word. Hy vra vir volhoubare energie-oplossings om Suid-Afrika se energietoekoms te beveilig:

Munisipaliteite in Gauteng het saamgestaan om Eskom se voorgestelde tariefverhoging vir die 2025/2026 finansiële jaar te verwerp en sê dit is oormatig en onregverdigbaar hoog. Die kragvoorsiener het vir April 2025 tot Maart 2028 aansoek gedoen vir ‘n tariefverhoging van 36-persent en ‘n verdere 11-komma-agt-persent en nege-komma-een persent onderskeidelik in die volgende twee jaar. City Power se woordvoerder, Isaac Mangena, sê daar kan nie van inwoners verwag word om hierdie buitensporige verhogings te betaal nie:

# Die Verenigde Nasies se Wêreldvoedselprogram brei sy operasies in Haïti uit om in die toenemende voedselnood te voorsien. Meer as 50-duisend inwoners van Haïti moes die afgelope twee weke vlug weens die bedreiging van gewapende groepe. Vyf-komma-vier-miljoen mense regoor dié land word deur erge honger in die gesig gestaar. Die getal mense in Haïti sonder heenkome het ver oor 700-duisend toegeneem. Die agentskap sê hy het sover vanjaar noodbystand, skoolvoedsel en maatskaplike beskerming aan een-komma-sewe-miljoen mense regoor Haïti voorsien.

# Rugby: Die gewese Wallabies-speler Jordan Petaia gaan ‘n loopbaan in die Amerikaanse Nasionale Voetballiga – die NFL – najaag nadat hy in die International Player Pathway-program aanvaar is. Die program gee ook aan atlete van ander sportsoorte geleentheid vir ‘n kontrak by een van die 32 NFL-spanne. Die 24-jarige sal tien weke by ‘n afrigtingskamp in Florida deurbring voordat hy kans sal kry om agente in Maart op ‘n voetbaldag te beïndruk. Petaia sê dit voel soos die regte tyd om sy droom na te jaag:

# En die finansiële aanwysers: Die rand verhandel teen 18-rand-15-sent teen die dollar, 19-rand-3-sent teen die euro en 22-rand-95-sent teen die pond. Bitcoin verhandel teen 96-duisend-172-dollar-61-sent. Die prys van goud is twee-duisend-641X-dollar-72-sent per fynons en die prys van Brent ruolie 71-dollar-88-sent per vat.

Bly ingeskakel vir meer nuus……………….