Nuus 09:00

BULLETIN 30 November 9 vm

Goeiemôre. Ek is……..

In die bulletin:

# Die adjunkpresident vra vir eenheid in die BELA Wet-onderhandelingsproses
# Nuwe samewerking tussen OUTA en die Parlement beloof verbeterde openbare betrokkenheid
# En krieket: Slegs trots is op die spel vir die Protea-vroue in die laaste T20 teen Engeland in Centurion

# Adjunkpresident Paul Mashatile het ‘n beroep op alle politieke partye in die regering van nasionale eenheid gedoen om te hou by die goedgekeurde proses vir die bespreking van die Wysigingswet op Basiese Onderwyswette. Hy het aansprake van ‘n ooreenkoms waarby die vakbond Solidariteit en AfriForum betrokke was, van die hand gewys en sê dit vorm nie deel van die amptelike bemiddelings-meganisme nie. Mashatile se waarnemende woordvoerder, Keith Khoza, sê die RNE sal binnekort vergader om aanbevelings te hersien:

# Die Organisasie teen Belastingmisbruik het ‘n vennootskap met die Parlement aangegaan om openbare betrokkenheid by die wetgewende proses te verbeter. Die samewerking moet deursigtigheid verbeter en verseker die publiek se kwelvrae word beter verteenwoordig. OUTA se woordvoerder, Robyn Pasensie, hoop die samewerking sal inklusiewe dialoog tussen die publiek en wetgewers bevorder, wat demokrasie en die regering se reaksie op die behoeftes van landsburgers verbeter:

# Kaapstad se burgemeester, Georgin Hill-Lewis, het ‘n geskil verklaar oor die regulasies van die Distriksontwikkelingsmodel en beskryf dit as ongrondwetlik. Die regulasies het in Mei van krag geword en behels ‘n eenvormige plan vir munisipaliteite wat veto-reg aan die minister van Samewerkende Regering gee. Hill-Lewis glo dit ondermyn munisipale outonomie en dupliseer bestaande Geïntegreerde Ontwikkelingsplanne. Die stad vra ‘n oplossing deur die Wet op die Tussenregerings-verhoudingsraamwerk en hoop die regulasies sal gewysig of onttrek word om verdere regstappe te voorkom.

# Die president van Frankryk Emmanuel Macron het sy steun vir Oekraïne herbevestig en weer in ‘n telefoongesprek met president Volodymyr Zelensky die eskalasie van Rusland se aanvalle op die land veroordeel. ‘n Verklaring deur Macron se kantoor lui hy het gister met Zelensky gepraat en “op die sterkste moontlike manier Rusland se blindelingse aanvalle veroordeel wat aanmekaar vererger teen dorpe, burgelikes en Oekraïne se energie-infrastruktuur. ‘n Afsonderlike verklaring deur Zelensky op die Telegram sosiale mediaplatform sê hy het weer aan Macron die belangrikheid beklemtoon van ‘n NAVO-uitnodiging aan Oekraïne.

# En, krieket: Slegs trots is op die spel vir die Protea-vroue in vandag se derde en laaste T20 teen Engeland op SuperSportpark in Centurion. Die besoekers het reeds die reeks beklink deur die eerste twee kragmetings te wen. Hulle het die gasvroue met vier paaltjies geklop in Oos-Londen, gevolg deur ‘n oortuigende oorwinning met 36 lopies in Benoni. Die T20s word gevolg deur eendagwedstryde in Kimberley, Durban en Potchefstroom vanaf Woensdag, terwyl die eenmalige toets die 15de van volgende maand in Bloemfontein begin.

Bly ingeskakel vir meer nuus……………….