Nuus 09:00

BULLETIN 29 November 9 vm

Goeiemôre. Ek is……..

In die bulletin:

# Die president van die ANC-jeugliga sê Ramaphosa is hier om te bly
# Die Rea Vaya-busdiens word hervat ná ‘n interdik
# En Ciprus wil by NAVO aansluit met die hulp van die Verenigde State

# Die president van die ANC se Jeugliga, Collen Malatji, sê die EFF en ATM mors hulle tyd met pogings om parlementêre prosesse te laat herleef vir die verwydering van president Cyril Ramaphosa. Dit volg na die partye die Konstitusionele Hof vroeër die week genader het om die Nasionale Vergadering se besluit uit te daag om nie die Artikel 89-verslag oor die Phala Phala-skandaal te aanvaar nie. Malatji sê die EFF en die ATM probeer om Phala Phala en die naam van die president te gebruik om hulle relevansie te laat herleef. Hy voeg by hulle wil verseker Ramaphosa voltooi sy tweede termyn.

# Die Parlement se portefeuljekomitee oor Indiensneming en Arbeid verwelkom die vordering wat gemaak word met die herposisionering van die Werkloosheidsversekeringsfonds en die Vergoedingsfonds. Die twee instellings gaan onafhanklik van die Departement van Indiensneming en Arbeid wees. Die herstrukturering van die twee fondse maak voorsiening vir die opgradering van IT-stelsels, organisatoriese herstrukturering, die aanstel van geskikte vaardige personeel, en die verbetering van dienslewering. Die komiteevoorsitter, Boyce Maneli het die herposisioneringsprojek as ‘n vars luggie beskryf:

# Fase een-A van die Rea Vaya busvervoerstelsel hervat vanoggend sy roetes in Soweto na die Passassiersversekeriningsorganisasie ‘n interdik verkry het. Dit volg na ontwrigtings deur taxiverenigings weens verkeerde registrasieplate op die busse. Die Stad Johannesburg se burgemeesterskomiteelid vir Vervoer, Kenny Kunene, het aan Newzroom Afrika gesê die hofbevel verbied taxiverenigings om met vervoerbedrywighede in te meng en verseker die veiligheid van Rea Vaya-personeel en klante:

# Ciprus wil by NAVO aansluit en onderhandel met Amerika om te voldoen aan die voorwaardes om in die militêre alliansie aanvaar te word. ‘n NAVO-lid, Turkye, is gekant teen Ciprus se moontlike lidmaatskap, want hy erken nie die regering van die eiland se Griekssprekende suide nie. Ciprus is verdeel sedert 1974, toe Turkye die noorde ingeval het na ‘n staatsgreep wat deur Griekeland gesteun is. Meer as 30-duisend Turkse soldate is steeds op die eiland gestasioneer.

# Sokker: Manchester United het onder leiding van sy nuwe baas, Ruben Amorim, op ‘n wen-noot op Old Trafford afgeskop toe hy Bodo/Glimt in die Europese Liga met drie-twee verslaan het. Rasmus Hojlund se twee doele en een van Alejandro Garnacho het United se kans om outomaties vir die laaste 16 te kwalifiseer ʼn hupstoot gegee. Chelsea het al vier sy wedstryde in die kompetisie gewen toe hy Heidenheim met twee-nul afgeransel het terwyl Tottenham en Roma se wedstryd gelykop met twee elk geëindig het. Amorim sê hy kan ʼn verbetering by sy spelers sien:

# En die finansiële aanwysers: Die rand verhandel teen 18-rand-4-sent teen die dollar, 19-rand-7-sent teen die euro en 22-rand-93-sent teen die pond. Bitcoin verhandel teen 96-duisend-404-dollar. Die prys van goud is twee-duisend-660-dollar-81-sent per fynons en die prys van Brent ruolie 72-dollar-76-sent per vat.

Bly ingeskakel vir meer nuus……………….