Nuus 09:00

BULLETIN 24 November 9 vm

Goeiemôre. Ek is……..

In die bulletin:

# Die Jacob Zuma-stigting praat met prokureurs en politieke strukture nadat hy uitgeskop is uit die ANC
# Die minister van Polisie vra optrede oor bou-afpersing
# En, tennis: Novak Djokovic stel Andy Murray aan as sy afrigter vir die Australiese Ope

# Die Jacob Zuma-stigting sê hy sal met politieke strukture en regsraadgewers beraadslaag oor oudpresident Jacob Zuma se uitsetting uit die ANC. Zuma is in Julie uitgeskop vir die verbreking van afdeling 25 van die grondwet van die ANC deur die MK-party te steun toe hy nog ‘n lid van die ANC was. Zuma se woordvoerder, Mzwanele Manyi, het aan Newzroom Afrika gesê Zuma is nie ‘n regverdige kans gegee om sy saak voor te lê nie:

# Die minister van Polisie Senzo Mchunu vra maatskappye om afpersing in die bousektor aan te meld. Mchunu het die Nasionale Konstruksiespitsberaad in Durban toegespreek en misdaadvoorkoming en gemeenskapsbetrokkenheid beklemtoon om wetteloosheid aan bande te lê. Dit volg op ‘n samewerkingsooreenkoms wat onderteken is om veilige, misdaadvrye boupersele landwyd te verseker. Hy beskryf KwaZulu-Natal, die Wes- en Oos-Kaap en Gauteng as brandpunte:

# Die SAKP het die Internasionale Strafhof se besluit verwelkom om lasbriewe uit te reik vir die inhegtenisneming van Israel se eerste minister Benjamin Netanyahu en die voormalige minister van Verdediging Yoav Gallant vir oorlogsmisdade. Dit volg nadat die Strafhof Israel se regsuitdaging onder die Statuut van Rome verwerp het. Die SAKP veroordeel egter die gelyktydige lasbrief teen die Palestynse leier Mohammed Deif, en sê stel die onderdruktes en die onderdrukkers op ‘n gelyke voet.

# Tennis: Novak Djokovic het Andy Murray aangestel as sy afrigter vir die 2025 Australiese Ope. Djokovic hoop om ‘n rekord elfde titel in Melbourne in te palm. Hy sê hy is opgewonde om een van sy grootste teenstanders as afrigter aan dieselfde kant van die net te hê. Murray, wat Djokovic geklop het vir die Amerikaanse Ope-titel in 2012 en Wimbledon in 2013, sê hy wil die 24-malige Grand Slam-kampioen help om sy mikpunte te bereik. Djokovic kon vir die eerste keer sedert 2017 vanjaar nie ‘n Grand Slam wen nie.

# En, BirdLife Suid-Afrika het die Rooibekrenostervoël aangewys as hulle Voël van die Jaar vir 2025. Die voël word die hele jaar lank herdenk, met hulpbronne wat vir leerders beskikbaar gestel word op die organisasie se webwerf. Renostervoëls lewer ‘n diens aan hul gashere asook die algehele ekosisteem deur bosluisbevolkings te beheer. Hulle waarsku ook hul gashere wanneer gevaar dreig. Die voël is ‘n koöperatiewe teler met tot sewe helpers wat die broeipaar bystaan om hul kleintjies te versorg, wat gewoonlik in gate in bome grootgemaak word.

Bly ingeskakel vir meer nuus……………….