Nuus 09:00
BULLETIN 22 November 9 vm
Goeiemôre. Ek is……..
In die bulletin:
# Die Polisie ondersoek dreigemente teen die bestuurshoof van die Openbare Beskermer
# Die DA sê die begrotingsbeperkings oorlaai maatskaplike werkers
# En Putin sê Rusland het ’n stad in Oekraïne geteiken met ‘n nuwe middelafstand-ballistiese-missiel
# Die Openbare Beskermer, Kholeka Gcaleka, sê die polisie ondersoek dreigemente wat teen die uitvoerende hoof van die Hoofstuk 9-instelling, Thandi Sibanyoni, gemaak is. Die dreigemente hou verband met die toelae van tien-miljoen rand wat die vorige Openbare Beskermer, Busisiwe Mkhwebane, beweer haar toekom. Gcaleka het verlede maand aan die Parlement gesê Mkhwebane se man, David Skosana, het dreigoproepe na haar gemaak en boodskappe aan Sibanyoni gestuur. Sy sê die boodskappe sluit een in van ‘n onbekende nommer waarin Sibanyoni se seuns gedreig word indien Mkhwebane nie haar geld ontvang nie.
# Die DA sê hy is bekommerd oor die situasie dat maatskaplike en hulpwerkers gedwing word om gemiddeld 100 gevalle per maand te hanteer, sowat 40 meer as die ideale aantal gevalle. Dit is weens begrotingstekorte wat die vul van noodsaaklike poste kniehalter. Bridget Masango van die DA sê van 30 Junie 2024 het die Departement van Maatskaplike Ontwikkeling slegs 44-duisend-525 maatskaplike werkers in diens, en nege-duisend-652 kinder- en jeugsorg-hulpwerkers:
# Die Stad Kaapstad het ‘n formele interregeringsgeskil verklaar oor wat hy beskryf as die ongrondwetlike en onwettige regulasies van die Distriksontwikkelingsmodel. Die regulasies het ingevolge die Wet op ‘n Raamwerk vir Interregeringsverhoudings in Mei in werking getree. Die burgemeester, Geordin Hill-Lewis, sê die regulasies bied ‘n mandaat aan elke munisipaliteit om ‘n plan op te stel vir goedkeuring van die minister van Samewerkende Regering en Tradisionele Sake, wat deur die kabinet aanvaar sal word:
# Die Russiese president Vladimir Putin, sê sy magte het ‘n nuwe middelafstand ballistiese missiel met ‘n nie-kern, hipersoniese plofkop ingespan om die oostelike stad Dnipro in Oekraïne te teiken. Hy sê die aanval is in reaksie op Oekraïne wat Amerikaanse en Britse langfstandwapens gebruik het om teikens in Rusland te tref. Putin sê Moskou is geregtig om militêre teikens in lande aan te val wat toelaat dat wapens teen Rusland gebruik word. Hy sê hulle is gereed om beslissend en met dieselfde vlak van geweld te reageer.
# Sokker: Manchester City se bestuurder, Pep Guardiola het ‘n tweejaar-kontrakverlenging onderteken wat beteken hy sal tot 2027 by die klub aanbly. Sy kontrak sou aan die einde van die seisoen verstryk. Die 53-jarige Spanjaard het in 2016 by Manchester City aangesluit en 18 trofeë ingepalm, insluitend ses Premierliga titels. Die kontrakverlenging volg na die nederlae teen Tottenham, Brighton, Sporting en Bournemouth. Guardiola sê sy fokus is om meer trofeë saam met City te verower:
# En die finansiële aanwysers: Die rand verhandel teen 18-rand-8-sent teen die dollar, 18-rand-94-sent teen die euro en 22-rand-75-sent teen die pond. Bitcoin verhandel teen 98-duisend-865-dollar-64-sent. Die prys van goud is twee-duisend-685-dollar-80-sent per fynons en die prys van Brent ruolie 73-dollar-95-sent per vat.
Bly ingeskakel vir meer nuus……………….