Nuus 09:00

BULLETIN 18 November 9 vm

Goeiemôre. Ek is……..

In die bulletin:

#  Die SAKP hersien sy verhouding met die ANC
# Joe Biden besoek die Amasone-reënwoud
# En gholf: Dean Burmester wen die Vodacom Origins of Golf-titel

# Die SAKP gaan sy vyfde spesiale nasionale kongres volgende maand gebruik om sy verhouding oor tientalle jare met die ANC te hersien. Die drie-party-alliansie se verhouding is gespanne na die ANC se besluit om die DA by die regering van nasionale eenheid in te sluit. Die SAKP sê in sy konferensiebesprekingsdokument sy identiteit as ‘n onafhanklike politieke entiteit het verswak en hy word al hoe meer as ‘n uitbreiding van die ANC gesien. Hy sê die nasionale verkiesingsuitslae het vrae oor die alliansie se doeltreffendheid laat toeneem.

# Die adjunkminister van Water en Sanitasie, Sello Seitlholo, moedig munisipaliteite aan om waterverliese weens onwettige verbindings en verouderde infrastruktuur dringend te hanteer. Tussen 37- en 47-persent van Suid-Afrika se water gaan verlore weens oorsake soos lekkasies en onwettige verbindings. Seitlholo sê die departement sal voortgaan om munisipaliteite te ondersteun om seker te maak water word volhoubaar aan gemeenskappe voorsien:

# Die GOOD-party vra die Stad Kaapstad om sy begroting aan te pas om die huidige uitbreking van voedseloordraagbare siektes te hanteer. Sedert September is daar landwyd 890 voorvalle van voedseloordraagbare siektes aangemeld en die meeste hiervan was in Gauteng en KwaZulu-Natal. In Gauteng is 23 sterftes aangemeld waarvan die meeste kinders was. Die GOOD-party sê ‘n nood-begrotingsaanpassing sal die departemente van Onderwys, Gesondheid en Afvalbestuur in staat stel om die krisis te hanteer.

# Joe Biden het die eerste sittende Amerikaanse president geword om die Amasone te besoek – die wêreld se grootste tropiese reënwoud. Hy het gister met plaaslike en inheemse leiers vergader wat werk om die kritieke ekostelsel te bewaar en te beskerm. Die Amasone-streek is ‘n bergplek vir massiewe hoeveelhede van die wêreld se koolstofdioksied, ‘n kweekhuisgas wat klimaatverandering dryf. Biden het ‘n proklamasie onderteken wat die 17de November as Internasionale Bewaringsdag aandui. Hy het die stryd teen klimaatsverandering as ‘n bepalende aspek van sy presidentskap beskryf:

# Gholf: Dean Burmester van Suid-Afrika het die Vodacom Origins of Golf-titel met sewe houe ingepalm en Jean Hugo geklop na hy ses onder 66 by die Oubaai-gholflandgoed in George, in die Wes-Kaap aangeteken het. Hy het die het tweede grootste oorwinningsmarge in die geskiedenis van die reeks geëwenaar. Jacques Kruyswick het derde op 20 onder baansyfer geëindig. Burmester, wat sy eerste LIV Golf-oorwinning in April in Miami behaal het, sê dit is baie spesiaal om voor sy familie en vriende te wen:

# En die finansiële aanwysers: Die rand verhandel teen 18-rand-13-sent teen die dollar, 19-rand-10-sent teen die euro en 22-rand-89-sent teen die pond. Bitcoin verhandel teen 90-duisend-532-dollar. Die prys van goud is twee-duisend-591-dollar-34-sent per fynons en die prys van Brent ruolie 71-dollar-12-sent per vat.

Bly ingeskakel vir meer nuus……………….