Nuus 09:00

BULLETIN 9 November 9 vm

Goeiemôre. Ek is……..

In die bulletin:

# Eskom roep ‘n plan vir ontbondelde tariewe weer op om ware koste te weerspieël
# Saftu gaan voor die Israeliese ambassade in Pretoria betoog in solidariteit met Palestina
# En, krieket: Indië oorweldig die Proteas in die eerste T20-kragmeting

# Eskom stel ontbondelde elektrisiteitstariewe voor om die ware koste te weerspieël deur die skeiding van veranderlike en vaste kostes. Die verskuiwing kan uitloop op laer tariewe vir talle huishoudelike verbruikers en munisipaliteite. Die onafhanklike konsultant Shirley Salvoldi het met News24 gepraat en gewys op ‘n gemengde uitwerking op klante, hoewel Eskom se inkomste neutraal bly. Eskom mik na regverdige pryse en hernubare integrasie vir ‘n mededingende elektrisiteitsmark teen 2026.

In nog ‘n verwikkeling waarsku die energiekenner Sampson Mamphweli Eskom se voorgestelde kragonderbrekings in die Stad Johannesburg weens ‘n skuldgeskil van 4,9-miljard-rand, kan ekonomiese groei hokslaan. Die stad het Eskom vyf dae gegee om die dreigement terug te trek. Terwyl die stad sit met ‘n bykomende rekening van 1,4-miljard-rand, het hy die planne veroordeel en gevra vir dringende onderhandelings om inwoners en ondernemings teen ontwrigtings te beskerm. Mamphweli het op die SABC beklemtoon ‘n dringende oplossing is nodig:

# Die Suid-Afrikaanse Plaaslike Regeringsvereniging in KwaZulu-Natal het dringend met munisipale omgewingsgesondheidspraktisyns vergader om toenemende voedselvergiftigingsvoorvalle onder leerders te bespreek. Dit gebeur terwyl honderde leerders geraak is deur die uitbreking. In ‘n onderhoud met die SABC het die direkteur van SALGA in die provinsie, Sabelo Gwala, kommer uitgespreek oor tekortkomings in die stelsel en stygende misdaadbedrywighede, en gevra vir beslissende maatreëls om nog sterftes weens besmette kos te keer:

# Die vakbondfederasie Saftu, saam met die Palestine Solidarity Alliance, gaan vandag by ‘n anti-volksmoordprotes voor die Israeliese Ambassade in Pretoria aansluit. Die betoging, wat vanmiddag om 12-uur begin, is in solidariteit met Palestina en Libanon, veroordeel Israel se optrede en bestempel dit as volksmoord en apartheid. Die betoging vra vir ‘n einde aan die geweld en vir globale eenheid teen die voortslepende konflik.

# En, krieket: Indië was gisteraand veels te sterk vir die Proteas in hulle aanvangs-T20-kragmeting op Kingsmead in Durban. Die besoekers het ‘n oortuigende 61-lopie oorwinning behaal en het nou ‘n 1-0 voorsprong in die reeks van vier wedstryde. Indië het 202 vir 8 aangeteken en Suid-Afrika is almal uitgeboul vir 141. Indië se sterkolwer, Sanju Samson, het gesorg vir ‘n briljante 107 van net 56 balle af, terwyl Heinrich Klaasen en Ryan Rickelton vir Suid-Afrika onderskeidelik net 24 en 21 kon aanteken. Die volgende wedstryd in die reeks word môre op St Georgespark gespeel.

Bly ingeskakel vir meer nuus……………….