Nuus 09:00

BULLETIN 8 Desember 9 vm

Goeiemôre. Ek is……..

In die bulletin:

# Tongaat Hulett se hoof, Dan Marokane, word waarskynlik Eskom se nuwe uitvoerende hoof
# Action Society vra ‘n beleid van geen borgtog vir beskuldigdes in geweldsmisdaad
# En, Hunter Biden staan tereg op nege aanklagte van belastingbedrog

# Die suikervervaardiger Tongaat Hulett se uitvoerende hoof, Dan Marokane, gaan na verwagting as die nuwe Eskom-hoof aangestel word ná ‘n jaar lange soektog na ʼn geskikte persoon. Hy was voorheen die kragverskaffer se hoof van groepskapitaal. Eskom se vorige hoof, André de Ruyter, het sy pos skielik in Februarie verlaat. Volgens berigte is ʼn spesiale kabinetsvergadering vir vandag belê om Marokane se aanstelling goed te keur. Eskom se woordvoerder, Daphne Mokwena, sê die hoof se aanstelling word deur die aandeelhouer gedoen en ʼn aankondiging sal volg sodra ʼn besluit geneem is.

# Action Society vra ‘n beleid van geen borgtog vir beskuldigdes in geweldsmisdade teen vroue en kinders, en sê dit behoort die standaard-gebruik in Suid-Afrika te wees. Dit volg nadat die Landdroshof in Amanzimtoti die borgtogaansoek uitgestel het van Werner de Jager, wat tereg staan vir die moord op sy vrou, die predikant Liezel de Jager, in KwaZulu-Natal in 2021. Hy sal op 9 Januarie aansoek doen om borgtog. Action Society se direkteur van Gemeenskapsveiligheid, Ian Cameron, glo dit is noodsaaklik om te verhoed dat gewelddadige mans vry rondloop:

# Die Wes-Kaapse premier Alan Winde sê hy sal aan president Cyril Ramaphosa skryf en aandring dat hy nie die Nasionale Gesondheidsversekeringswetsontwerp bekragtig nie. Die Nasionale Raad van Provinsies het die wetsontwerp Woensdag aanvaar. Die Wes-Kaap was die enigste van die nege provinsies wat daarteen gestem het. Winde sê soos dit tans is, skend die NGV-wetsontwerp die Gesondheidswet van 1977 en die Grondwet se voorskrifte vir Gesondheid:

# Die Amerikaanse president Joe Biden se seun, Hunter, staan in Kalifornië tereg op nege aanklagte van federale belastingbedrog. Dis is sy tweede strafregtelike saak.  Die 57-jarige Biden word aangekla omdat hy nie belastingaanslae ingedien en betaal het nie, aanslae vermy het en ʼn vals of bedrieglike belastingopgawe ingedien het. Federale aanklaers beweer Biden het tydens ʼn vierjaar-skema van 2016 tot 2019 nagelaat om minstens 26,25-miljoen-rand aan federale inkomstebelasting te betaal. Hy staar tronkstraf van 17 jaar in die gesig indien hy skuldig bevind word. Hy is in September in Delaware aangekla op federale vuurwapenaanklagte.

# Gholf: Die Meesterskampioen en wêreld-nommer-drie, Jon Rahm, is die jongste hoëprofielspeler wat by die Saoedi-ondersteunde LIV-gholfliga aangesluit het. Die Spanjaard het verlede jaar gesê LIV se driedag-lange toernooie waar almal gelyk begin en niemand uitgeskakel word nie, is nie aanloklik nie en hy verkies ʼn gholf-nalatenskap bo geld. Rahm, wat volgens berigte sowat 10,6-miljard-rand gaan verdien, sê die besluit is om baie redes geneem en ook wat hy reken die beste vir hom en sy gesin is:

# En die finansiële aanwysers: Die rand verhandel teen 18-rand-75-sent teen die dollar, 20-rand-22-sent teen die euro en 23-rand-61-sent teen die pond. Bitcoin verhandel teen 43-duisend-459-dollar-12-sent. Die prys van goud is twee-duisend-31-dollar-17-sent per fynons en die prys van Brent ruolie 75-dollar-19-sent per vat.

Bly ingeskakel vir meer nuus……………….