Nuus 08:00

BULLETIN 21 Januarie 8 vm 

Goeiemôre. Ek is……..

In die bulletin:

# President Ramaphosa vra vir hervorming van die Verenigde Nasies 
# Beurtkrag word tot verdere kennisgewing opgehef 
# En, rugby: Die Stormers en Bulle kwalifiseer vir uitspeelwedstryde in Kampioene-beker

# President Cyril Ramaphosa het ‘n beroep gedoen op voortgesette multilaterale verhoudings en die hervorming van die Verenigde Nasies. Ramaphosa het gepraat op die 19de spitsberaad van die Beweging van Onverbonde Lande in Kampala, Uganda. Internasionale regering, menseregte en die oorlog tussen Israel en Hamas was die belangrikste onderwerpe van bespreking op die vergadering. Die president sê globale geskille en streekskonflikte moet deur onderhandeling opgelos word:

# Eskom sê hy kon vanweë verbeterde opwekkingsvermoë beurtkrag tot verdere kennisgewing ophef. Dit het hom toegelaat om ook naweek-onderbrekings te verminder. Die Eskom-woordvoerder, Daphne Mokwena, bedank Suid-Afrikaners wat die oproep vir spaarsamige en doeltreffende gebruik van krag gehoorsaam, wat insluit die afskakel van geysers en swembadpompe. Dit verminder die aanvraag, help met die verligting van druk op die stelsel en dra by tot laer fases van beurtkrag.

# Die DA sê die kantoor van die minister van Minerale Bronne en Energie, Gwede Mantashe, het ontvangs erken van ‘n versoek wat die party ingedien het. Die DA vra ‘n verlenging van die spertyd vir openbare voorleggings oor die konsep Geïntegreerde Hulpbronplan 2023, van die huidige 23 Februarie tot 30 April. Die woordvoerder Kevin Mileham sê belanghebbers is bekommerd die huidige spertyd gee hulle nie genoeg tyd om behoorlik ondersoek in te stel na die onderliggende aannames en projeksies in die plan nie:

# Die Verenigde Nasies se uitvoerende direkteur vir Vroue, Sima Bahous, sê dit is nou meer as 100 dae sedert die Hamas-aanvalle op Israel op 7 Oktober en die afgryse wat daarna gevolg het, veral in Gaza. Die VN het sedertdien weer eens bewyse gesien dat vroue en kinders die eerste slagoffers van konflik is, en die plig om vrede te soek is ‘n plig wat aan hulle verskuldig is. Bahous sê sonder verandering gaan die eerste 100 dae bloot ‘n voorspel tot die volgende 100 wees. Sy benadruk vroue en kinders is in die meerderheid van diegene wat doodgemaak, gewond en ontheem is.  

# En laastens, Rugby: Die Stormers het gisteraand daarin geslaag om ‘n agterstand teen Stade Francais in Parys op die nippertjie in ‘n oorwinning om te keer om so ‘n tuis-uitspeelwedstryd in die Kampioene-beker te verseker. ‘n Drie deur Manie Libbok in die 71ste minuut, in sy 50ste wedstryd vir die Stormers, het aan die span ‘n bonuspuntoorwinning van 24-20 by die Stade Jean-Bouin besorg. Marcell Coetzee het vroeër in die Bulle se opwindende kragmeting teen die Bordeaux Begles op Loftus twee drieë ingeryg wat gehelp het om hulle ‘n bonuspunt-oorwinning van 46-40 te gee. Hulle kwalifiseer nou ook vir die uitspeelfase. Die twee spanne het elk ses drieë in die wedstryd gedruk.

Bly ingeskakel vir meer nuus……………….