Nuus 08:00

BULLETIN 27 Junie 8 vm

Goeiemôre. Ek is……..

In die bulletin:

# Die adjunkminister van Polisie sê die organiseerders van die 30 Junie-betogings is ‘n klein groepie misleide mense
# Fikile Mbalula stel die ANC-Vroueliga se vrywilligersveldtog bekend om die party se verkiesingsveldtog vir 2026 te dryf
# En motorsport, Kimi Antonelli oorheers die eerste twee oefenrondes by die Oostenrykse Grand Prix

# Die adjunkminister van Polisie, Polly Boshielo, het die organiseerders van die beplande betogings op 30 Junie beskryf as ‘n klein groepie misleide mense. Boshielo het gister ‘n gesamentlike wetstoepassingsbyeenkoms by die FNB-stadion toegespreek. Haar opmerkings volg te midde van verskerpte voorbereidings deur die owerhede vir landwye betogings oor immigrasiekwessies. Sy het bygevoeg operasionele planne is in plek om openbare veiligheid te verseker en enige geweld of ontwrigting te voorkom. Die regering het herhaal dat hoewel vreedsame betogings toegelaat word, sal wetteloosheid en intimidasie nie geduld word nie, met veiligheidsmagte op hoë gereedheid.

Die Nasionale Taxi-alliansie sê intussen die taxibedryf sal soos gewoonlik voortgaan en kan nie bekostig om bedrywighede op 30 Junie te staak nie, ten spyte van beplande betogings teen onwettige immigrasie. Woordvoerder Theo Malele sê hoë brandstofpryse, terugbetaling van voertuigfinansierings en stygende onderhoudskoste maak enige ontwrigting finansieel onvolhoubaar. Hy sê die bedryf bly daartoe verbind om noodsaaklike vervoerdienste te lewer terwyl hulle met wetstoepassingsagentskappe saamwerk om vrede en orde te handhaaf. Die Suid-Afrikaanse Nasionale Taxiraad het ook bevestig dat sy bedrywighede tydens die beplande betogings soos normaal sal voortgaan.

# Die sekretaris-generaal van die ANC, Fikile Mbalula, het amptelik die Vroueliga se nasionale vrywilligersprogram by die Saulsville Arena in Tshwane bekendgestel. Hy het die inisiatief as die primêre dryfkrag agter die party se veldtog vir die plaaslike regeringsverkiesing op 4 November verklaar. Mbalula het ‘n stampvol stadion toegespreek en vrywilligers gevra om deeglike deur-tot-deur-veldtogte in alle gemeenskappe te voer om openbare griewe oor mislukte basiese dienslewering direk aan te spreek en op te los:

# Die vakbondfederasie Cosatu sê die Konstitusionele Hof se uitspraak wat die grondwetlikheid van die Wetsontwerpe op Kopieregwysigings en Beskerming van Uitvoerende Kunste bevestig, bied broodnodige sekerheid aan kunstenaars na meer as ‘n dekade van vertragings. Matthew Parks van Cosatu sê die uitspraak sal die regte van akteurs, kunstenaars en musici versterk. Parks het kommer uitgespreek oor die hof se besluit om spesifieke vrystellings vir opvoedkundige materiaal te skrap, aangesien bekostigbare toegang tot leerbronne steeds belangrik bly:

# Motorsport: Die Mercedes-nuweling Kimi Antonelli het gister se oefensessies by die Oostenrykse Grand Prix in Spielberg oorheers en albei gewen. Antonelli het die tweede oefensessie in ‘n blitsige tyd voltooi en ver gewen. McLaren was ook goed op dreef met Oscar Piastri en Lando Norris in die tweede en derde plekke. Max Verstappen het probleme met die Red Bull se bestuurbaarheid en sitplekke ondervind maar vierde klaargemaak. Lewis Hamilton van Ferrari was vyfde ten spyte van ‘n stryd teen die versengende hitte en stuurprobleme.

# En ten slotte, die toerisme-operateur, West Coast Way, verwag vanjaar ‘n skouspelagtige superbloei van veldblomme langs die Weskus, met vroeë tekens wat reeds in gebiede soos die Biedouw-vallei in die Wes-Kaap te sien is. Die seisoenale blomtyd, sal danksy gunstige reënval dele van die Kaapse Weskus, die Sederberge en Namakwaland in ‘n skouspel van veldblomme omskep met inheemse spesies soos madeliefies en fynbos. Die seisoenale reën is belangrik vir tydsberekening en die intensiteit van die blomtyd, wat elke jaar se skouspel vir besoekers uniek maak.

Bly ingeskakel vir meer nuus……………….