Nuus 08:00

BULLETIN 9 Desember 8 vm

Goeiemôre. Ek is……..

In die bulletin:

# RISE Mzansi sê Suid-Afrika sit op ‘n elektrisiteits- en ekonomiese tydbom
# Die ANC-jeugliga in Gauteng gaan vir die eerste keer in 10 jaar nuwe leiers kies
# En Joe Biden sê die val van die Assad-regime is ‘n geskiedkundige geleentheid

# RISE Mzansi sê die minister van Elektrisiteit en Energie, Kgosientsho Ramokgopa, se verklaring dat verbruikers munisipaliteite 347,6-miljard skuld; en munisipaliteite wat Eskom op hulle beurt 90-miljard-rand skuld, skep ‘n tydbom met die potensiaal om die ekonomie selfs verder af te takel. Makashule Gana van RISE Mzansi sê die bedrag is meer as die gesamentlike begrotings van die kritieke departemente van Polisie, Gesondheid, Basiese, en Hoër Onderwys, met nog miljarde rand oor:

# Die minister van Maatskaplike Ontwikkeling, Sisi Tolashe, sê die Nasionale Ontwikkelingsagentskap het haar volle ondersteuning op voorwaarde dat hy sy doelwitte bereik. Die minister het ‘n vergadering met die agentskap se raad belê om dringende kwessies te hanteer. Dit sluit in dat die agentskap sedert 2021 sonder ŉ uitvoerende hoof bedryf word. Thabani Buthelezi is die huidige waarnemende hoof. Tolashe sê sy kan nie ŉ instelling ondersteun wat nie aan verwagtinge voldoen en nie op armes se behoeftes reageer nie.

# Die ANC-jeugliga in Gauteng gaan die eerste keer in tien jaar ŉ nuwe leierskap verkies tydens sy provinsiale kongres wat vandag in Boksburg begin. Die liga moet voor 9 Februarie 2025 takke herbou, en streeks- en provinsiale vergaderings hou. Die jeugliga se president, Collen Malatji, sê die jong mense van Gauteng moet die leierskap verkies en hulle uitvoerende magte gee om hul werk te doen:

# Die Amerikaanse president Joe Biden sê die val van Sirië se president Bashar al-Assad se regime is ŉ basiese geval van geregtigheid. Siriese teen-regeringsrebelle het verklaar hulle het al-Assad uit die kussings gelig nadat hulle Damaskus Sondag ingeneem het. Dit beëindig sy familie se dekade lange outokratiese beheer ná ŉ burgeroorlog van meer as 13 jaar. Al-Assad en sy familie het na Rusland gevlug. Biden sê dis ook ŉ geskiedkundige geleentheid vir die Siriese volk:

# Motorsport: Lando Norris het die seisoen se laaste Grand Prix in Abu Dhabi gewen en aan McLaren sy eerste Formule Een-vervaardigerstitel in 26 jaar besorg. Die Brit het van die begin af voorgeloop om sy vierde sege van die seisoen op te raap. Carlos Sainz en Charles Leclerc van Ferrari was onderskeidelik tweede en derde. Lewis Hamilton in sy laaste wedren vir Mercedes was vierde en sy spanmaat, George Russel, vyfde. Norris sê dis ŉ ongelooflike prestasie vir die span:

# En die finansiële aanwysers: Die rand verhandel teen 18-rand-2-sent teen die dollar, 19-rand-1-sent teen die euro en 22-rand-94-sent teen die pond. Bitcoin verhandel teen 71-duisend-215-dollar. Die prys van goud is twee-duisend-642-dollar-61-sent per fynons en die prys van Brent ruolie 71-dollar-21-sent per vat.

Bly ingeskakel vir meer nuus……………….