Nuus 08:00

BULLETIN 5 Desember 8 vm

Goeiemôre. Ek is……..

In die bulletin:

# Brian Molefe stel voor Eskom plaas die hele land op voorafbetaalde elektrisiteit
# ‘n Verdere meer as 20 onwettige mynwerkers verlaat die Stilfontein-myn
# En Franse LP’s het premier Barnier met ’n mosie van wantroue uit die kussings gelig

# ‘n MK-parlementslid, Brian Molefe, stel voor Eskom stel oor die hele Suid-Afrika voorafbetaalde krag in om niebetaling te hanteer. Die minister van Elektrisiteit en Energie, Kgosientsho Ramokgopa, het verlede maand gesê munisipale skuld het binne drie maande opgeskiet van 78-miljard-rand in Julie tot 90-miljard-rand. Molefe, ŉ voormalige Eskom-hoof, het aan die parlementêre portefeuljekomitee oor Elektrisiteit en Energie gesê dit kan opgelos word indien verbruikers vooruit betaal:

# Die Gautengse Hooggeregshof het teen die regering se plan beslis om een-duisend-500 megawatt steenkoolkrag aan te skaf en beskou dit weens gesondheidsrisiko’s as ongrondwetlik. Die besluit is deur omgewingsgroepe betwis en die hof het bevind die plan van 2019 is onwettig en wys op die ernstig impak van steenkool op openbare gesondheid. Regter Cornelius van der Westhuizen het veral verwys na die skending van die grondwetlike reg op gesondheid. Aktiviste sê ondanks hierdie oorwinning maak Suid-Afrika steeds te veel op steenkool staat maar bevorder hernubare energie.

# Polisie in Noordwes het bevestig 26 onwettige mynwerkers het Dinsdag en Woensdag uit ŉ skag by Stilfontein na die oppervlak gekom. Veertien is van Mosambiek, elf van Lesotho en een is ŉ Suid-Afrikaanse burger. Die polisiewoordvoerder, Sabata Mokgwabone, sê die onwettige mynwerkers is in hegtenis geneem en staar ŉ reeks aanklagte in die gesig:

# Die Franse eerste minister Michel Barnier is in ŉ geskiedkundige mosie van wantroue uitgestem, slegs drie maande nadat president Emmanuel Macron hom aangestel het. Dis die eerste keer in meer as 60 jaar dat ŉ Franse regering op hierdie manier omvergewerp word. Opposisiepartye het die mosie ingedien nadat Barnier op omstrede wyse spesiale magte gebruik het om sy begroting sonder ŉ stemmery deur te voer. Altesaam 331 wetgewers uit 577 het teen Barnier gestem. Hy sal vandag sy bedanking by Macron indien. Dis ŉ grondwetlike vereiste ná ŉ aanvaarde mosie van wantroue.

# Gholf: Die verdedigende kampioen, Max Homa, lei een van die sterkste velde van die Nedbank-uitdaagreeks by Sun City. Die Amerikaner wil die agste speler in die toernooi se geskiedenis word wat sy titel suksesvol verdedig. Saam met hom is sy landgenoot Will Zalatoris en die twee Kanadese, Corey Conners en Mackenzie Hughes. Thriston Lawrence lei ŉ sterk plaaslike groep wat Christiaan Bezuidenhout en Erik van Rooyen insluit. Lawrence sê dis altyd ŉ hoogtepunt om by die Gary Player-buiteklub te speel:

# En die finansiële aanwysers: Die rand verhandel teen 18-rand-15-sent teen die dollar, 19-rand-9-sent teen die euro en 23-rand-6-sent teen die pond. Bitcoin verhandel teen 102-duisend-841-dollar. Die prys van goud is twee-duisend-647-dollar-41-sent per fynons en die prys van Brent ruolie 72-dollar-21-sent per vat.

Bly ingeskakel vir meer nuus……………….