Nuus 08:00

BULLETIN 3 Desember 8 vm

Goeiemôre. Ek is……..

In die bulletin:

# Die EFF veroordeel Ramaphosa se verraad oor die BELA-wet
# Eskom skort die kragonderbreking vir Johannesburg en City Power op
# En padwedlope: Die inskrywingsperk vir volgende jaar se Comrades Marathon is bereik

# Die EFF sê hy veroordeel president Cyril Ramaphosa wat volgens hom toegee aan wit mense se belange deur die instelling van twee klousules van die Wet op Basiese Onderwyswette. Die klousules hou verband met taal- en toelatingsbeleid by openbare skole. Die EFF sê die onlangse ooreenkoms tussen die minister van Basiese Onderwys, Siviwe Gwarube en Solidariteit, wat die instelling van die klousules uitstel tot noodsaaklike regulasies ontwikkel is, wys volgens die party wie Suid-Afrika regeer. Hy sê dit ondermyn die Parlement se gesag en saboteer hervormingspogings in onderwys.

AZAPO versoek Ramaphosa intussen om die wet sonder versuim ten volle in te stel. Die organisasie het kommer uitgespreek oor onderhandelings agter toe deure tussen Solidariteit en die minister van Basiese Onderwys, Siviwe Gwarube, en beweer dit ondermyn swart vooruitgang. AZAPO se woordvoerder, Jabu Rakwena, beskuldig die regering van geheime samesprekings wat vordering belemmer rondom opvoedkundige ongelykheid, veral vir swart kinders in skole met ‘n gebrek aan hulpbronne:

# Eskom het sy kennisgewing oor ‘n moontlike kragonderbreking teen die Stad Johannesburg en City Power opgeskort. Die kragverskaffer het verlede maand ʼn kennisgewing uitgereik dat die metro, deur sy elektrisiteitsvoorsiener City Power, 4,9-miljard-rand geskiedkundige skuld het en 1,4-miljard op sy huidige rekening. Eskom se woordvoerder Daphne Mokwena sê die opskorting is om ʼn onafhanklike kenner wat die minister van Elektrisiteit aangestel het, tyd te gee om sy ondersoek na die ou rekening wat na bewering te hoog is, af te handel:

# Israel het lugaanvalle in die Nabatieh-distrik in die suide van Libanon uitgevoer waarin nege mense dood is. Dit volg nadat Hizbollah twee vuurpyle afgevuur het naby ʼn militêre basis in die betwiste Mount Dov-area op die Israel-Libanon-grens. Die twee kante beskuldig mekaar van die oortreding van die skietstilstand-ooreenkoms. Die Amerikaanse woordvoerder vir Buitelandse Sake, Matthew Miller, sê die skietstilstand is steeds van krag en die Amerikaans-geleide toepassingsmeganisme sal die skendings hanteer:

# Padwedlope: Die inskrywingsperk van 23-duisend vir volgende jaar se 98ste Comrades-marathon in KwaZulu-Natal, is Saterdag bereik, nege dae voor die amptelike afsnydatum. Meer as 80 nasies sal op 8 Junie deelneem aan die wedloop van sowat 89 kilometer van Pietermaritzburg na Durban. Die Comrades-marathonvereniging se waarnemende wedloop- en operasionele bestuurder, Alain Dalais, sê dit sal nog ʼn onvergeetlike en uitdagende resies wees.

# En die finansiële aanwysers: Die rand verhandel teen 18-rand-17-sent teen die dollar, 19-rand-6-sent teen die euro en 22-rand-97-sent teen die pond. Bitcoin verhandel teen 96-duisend-29-dollar-5-sent. Die prys van goud is twee-duisend-639-dollar-27-sent per fynons en die prys van Brent ruolie 71-dollar-75-sent per vat.

Bly ingeskakel vir meer nuus……………….