Nuus 08:00
BULLETIN 30 November 8 vm
Goeiemôre. Ek is……..
In die bulletin:
# Die adjunkpresident vra eenheid in die BELA Wet-onderhandelingsproses
# Jihadiste val Sirië se tweede grootste stad Aleppo aan in ‘n geveg met regeringsmagte
# En sokker: Arteta glo Arsenal bou weer momentum na ‘n swak lopie
# Adjunkpresident Paul Mashatile het ‘n beroep op alle politieke partye in die regering van nasionale eenheid gedoen om te hou by die goedgekeurde proses vir die bespreking van die Wysigingswet op Basiese Onderwyswette. Hy het aansprake van ‘n ooreenkoms waarby die vakbond Solidariteit en AfriForum betrokke was, van die hand gewys en sê dit vorm nie deel van die amptelike bemiddelings-meganisme nie. Mashatile se waarnemende woordvoerder, Keith Khoza, sê die RNE sal binnekort vergader om aanbevelings te hersien:
In nog ‘n verwikkeling het die Gautengse LUR vir Onderwys, Matome Chiloane, die minister van Basiese Onderwys, Siviwe Gwarube, se bilaterale ooreenkoms rakende die BELA-wet verwerp en noem dit uitsluitend en ‘n hindernis vir transformasie. Chiloane kritiseer bepalings wat skoolbeheerliggame toelaat om taalbeleide en leerdertoelatings te beïnvloed, en is van mening dit belemmer inklusiwiteit. Die departement se woordvoerder, Steve Mabona, sê die LUR dring aan op breër konsultasie om regverdige en transformerende onderwysbeleid te verseker:
# Die Platform van Beroepsuitnemendheid in Waterbestuur, die eerste van sy soort in Afrika, is deur die Onderwysopleidingsowerheid vir die Energie- en Watersektor, die Departement van Water en Sanitasie en die Universiteit Stellenbosch bekend gestel. Die inisiatief gee aandag aan gapings met vaardighede in die watersektor en fokus op volhoubare bestuur en vernuwing. Dit moet generasiegapings in kennis oorbrug en die verantwoordelike gebruik van water bevorder. Vennote beklemtoon sy transformerende rol om dit in ooreenstemming te bring met Suid-Afrika se Nasionale Vaardigheidsontwikkelingsplan 2030.
# Jihadiste en hul Turks-gesteunde bondgenote het Sirië se tweede grootste stad, Aleppo, bestook in ‘n groot offensief teen regeringsmagte in van die dodelikste gevegte in die land in jare. Minstens 255 mense is reeds in die gevegte dood, oorwegend soldate aan albei kante, terwyl 24 burgerlikes dood is na Russiese lugaanvalle ter ondersteuning van die Siriese regering. Die aanvalle kom op ‘n sensitiewe tyd vir Sirië en die streek met ‘n wankelrige wapenstilstand tussen Hizbollah en Israel wat Woensdag in die naburige Libanon in werking getree het.
# En sokker: Mikel Arteta sê Arsenal sal feitlik volmaak moet wees indien hulle die weghol-voorlopers in die Premierliga, Liverpool, wil inhaal, maar hy is oortuig hulle bou weer momentum na ʼn swak lopie. Die Gunners is bemoedig vir vandag se wedstryd teen West Ham nadat hulle Sporting Lisbon met 5-1 oorrompel het in die Kampioeneliga. ʼn Oorwinning vandag in die Londen-stadion sal Arsenal waarskynlik tot die tweede plek op die punteleer laat opskuif voor môre se wedstryde, wat ʼn allerbelangrike wedstryd insluit tussen Liverpool en Manchester City.
Bly ingeskakel vir meer nuus……………….