Nuus 08:00

BULLETIN 26 November 8 vm

Goeiemôre. Ek is……..

In die bulletin:

# RISE Mzansi sê Suid-Afrikaners is steeds nie veilig nie ondanks ‘n daling in misdaad
# Donald Trump se sake oor verkiesingsinmenging en geklassifiseerde dokumente word laat vaar
# En Cadillac is op pad na die F1 in 2026

# Die GOOD-party sê die jongste misdaadsyfers beklemtoon die skokkende vlakke van geweld waaraan vroue en kinders in die land blootgestel word. Tussen Julie en einde September vanjaar het moorde op vroue met 8,6-persent toegeneem en poging tot moord met 3,5-persent. Daar was 7,5-persent meer moorde op kinders. GOOD se sekretaris-generaal, Brett Herron, sê gemiddeld tien vroue en drie kinders word elke dag in Suid-Afrika vermoor:

RISE Mzansi sê intussen Suid-Afrikaners is steeds nie veilig nie al het die moord- en verkragtingsyfer in die tweede kwartaal van die 2024/2025-boekjaar afgeneem. Moord het met 5,8-persent gedaal, verkragting met 3,1-persent, en roof met verswarende omstandighede met 8,8-persent. Daar was egter ‘n toename in poging tot moord, aanranding met die doel om ernstig te beseer, en handelsmisdade. Mabine Seabe van RISE Mzansi sê landsburgers verdien om sonder vrees te lewe:

# Die polisie in Noordwes onderneem om tydens die voortgesette reddingsoperasie onwettige mynwerkers in hegtenis te neem sodra hulle uit die verlate Stilfontein-myn kom. Die adjunk provinsiale Kommissaris van Polisie, Patrick Asaneng, sê owerhede sal nie met die Zama Zamas onderhandel nie want hulle wil misdadigheid in die streek uitroei. Asaneng bevestig die polisie se verbintenis om die veiligheid te verseker van sowel wetstoepassers as diegene wat by die onwettige mynbou-bedrywighede betrokke is:

# Amerika se spesiale advokaat, Jack Smith, het ŉ regter gevra om twee federale misdaadsake teen verkose president Donald Trump te laat vaar. Hy het hom beroep op ŉ beleid van die Justisie-departement dat ŉ sittende president nie vervolg mag word nie. Die aanklagte dat Trump die 2020-verkiesing wou omkeer en geklassifiseerde dokumente nie behoorlik gebêre het nie, is laat vaar. Regter Tanya Chutkan het Smith se versoek aanvaar en die saak sonder vooroordeel teruggetrek. Dit beteken die aanklagte kan weer ingedien word wanneer Trump se tweede termyn verby is.

# Motorsport: Formule Een het in beginsel ŉ ooreenkoms met die Amerikaanse motorreus, General Motors, bereik dat sy Cadillac-handelsmerk van 2026 af as die elfde span sal deelneem. F1 het elke seisoen drie wedrenne in Amerika. General Motors se president, Mark Reuss, sê hulle is daartoe verbind om met passie en integriteit deel te neem om die sport wêreldwyd vir wedren-ondersteuners beter te maak. GM se toetrede sal die getal voertuigvervaardigers wat enjins vir F1 bou tot ses vermeerder. Die ander is Mercedes, Ferrari, Ford, Honda en Audi.

# En die finansiële aanwysers: Die rand verhandel teen 18-rand-9-sent teen die dollar, 18-rand-93-sent teen die euro en 22-rand-68-sent teen die pond. Bitcoin verhandel teen 94-duisend-475-dollar-95-sent. Die prys van goud is twee-duisend-628-dollar-24-sent per fynons en die prys van Brent ruolie 72-dollar-59-sent per vat.

Bly ingeskakel vir meer nuus……………….