Nuus 08:00

BULLETIN 22 November 8 vm

Goeiemôre. Ek is……..

In die bulletin:

# Minister Motshekga sê die SANW is in staat om die land te beskerm
# Die GOOD-party sê die Reserwebank se repokoersbesluit is teleurstellend en konserwatief
# En Matt Gaetz onttrek as Trump se benoeming vir prokureur-generaal

# Die minister van Verdediging en Militêre Veterane, Angie Motshekga, sê ondanks talle uitdagings wat die Suid-Afrikaanse Nasionale Weermag in die gesig staar, is hy in staat en gereed om die land te beskerm. Die Ouditeur-Generaal se verslag vir 2023/2024 beklemtoon ongebreidelde, ongemagtigde uitgawes in die departement van 3,4-miljard-rand en onreëlmatige uitgawes van 338-miljoen-rand. Slegs twee van die SANW se 26 Gripen vegvliegtuie is operasioneel en nie een van sy C130’s is lugwaardig nie. Motshekga sê die uitdagings word aangespreek:

# Die GOOD-party sê die besluit van die Reserwebank se Monetêre Beleidskomitee om die terugkoopkoers met 25 basispunte tot 7,75-persent te verlaag, is teleurstellend en te konserwatief. Talle ekonome meen die besluit moes eerder 50 basispunte gewees het. Die sekretaris-generaal van die GOOD-party, Brett Herron, sê Suid-Afrika is in ‘n ekonomiese krisis wat miljoene inwoners in werkloosheid en onaanvaarbare vlakke van armoede vasvang:

# Die Gautengse LUR vir Finansies en Ekonomiese Ontwikkeling, Lebogang Maile, doen ‘n beroep op die polisie om die wet toe te pas te midde van die voedselvergiftigingsvoorvalle in die provinsie. Dit volg na die dood van nog ‘n kind in Diepkloof, Soweto weens vermeende chemiese vergiftiging. Die Nasionale Rampbestuursentrum het voedseloordraagbare siektes as ‘n nasionale ramp verklaar. Maile sê die minagting van die wet deur spazawinkels onaanvaarbaar:

# Die voormalige kongreslid van Florida, Matt Gaetz, het hom onttrek as kandidaat om deur Donald Trump oorweeg te word vir die pos as prokureur-generaal. Gaetz is onder die vergrootglas oor bewerings van seksuele wangedrag, wat hy ontken. Die 42-jarige sê die omstredenheid oor sy moontlike benoeming was besig om n onregverdige afleiding te word van die werk van die inkomende Trump-administrasie. Trump het nou Pam Bondi benoem om sy prokueur-generaal te word. Sy is ‘n voormalige prokureur-generaal vir Florida en het in Trump se voormalige administrasie gewerk.

# Tennis: Die verdedigende kampioen, Italië, het Argentinië met twee-een geklop om na die halfeindstryd in Malaga, Spanje deur te dring. Die Italianers het die openingsenkelspelwedstryd verloor na Lorenzo Musetti die spit teen Francisco Cerundulo afgebyt het. Die wêreld nommer-een, Jannik Sinner, het Italië in spel gehou met ‘n sege teen Sebastian Baez. Hy het toe saam met Matteo Berrettini vir Maximo Gonzalez en Andre Molteni in die beslissende dubbelspelwedstryd geklop. Die ander lande in die halfeindstryd is die 28-malige kampioene Australië, Duitsland en Nederland.

# En die finansiële aanwysers: Die rand verhandel teen 18-rand-7-sent teen die dollar, 18-rand-93-sent teen die euro en 22-rand-75-sent teen die pond. Bitcoin verhandel teen 98-duisend-885-dollar-6-sent. Die prys van goud is twee-duisend-686-dollar-90-sent per fynons en die prys van Brent ruolie 74-dollar-15-sent per vat.

Bly ingeskakel vir meer nuus……………….