Nuus 08:00

BULLETIN 18 November 8 vm

Goeiemôre. Ek is……..

In die bulletin:

# BOSA vra vir streng toesig oor die township-ekonomiefonds
# Cosatu stel veranderinge voor in die benadering tot onwettige mynbou 
# En Biden magtig die eerste gebruik van Amerikaanse langafstandmissiele deur Oekraïne

# Build One South Africa sê hy verwelkom enige inisiatiewe om township-ekonomieë te ondersteun omdat dit die middelpunt is van vernuwing, entrepreneurskap en gemeenskappe se lewensbestaan. President Cyril Ramaphosa het ‘n fonds van 500-miljoen-rand aangekondig om township-ekonomieë te ondersteun. Dis deel van die regering se reaksie op die uitbreking van siektes wat deur kos oorgedra word en verbind word met sekere spazawinkels en straatsmouse. BOSA se woordvoerder, Roger Solomons, sê dit mag nie gebruik word as omkoopgeld vir individue met politieke bande of ʼn voertuig vir korrupsie nie:

# ʼn Politieke ontleder aan die Nelson Mandela Universiteit, Ntsikelelo Breakfast, sê die EFF-leier Julius Malema sien Mbuyiseni Ndlozi moontlik as ʼn bedreiging vir sy ambisie om aan mag vas te klou. Ndlozi is volgens berigte verbied om in Desember die party se Nasionale Vergadering van die Mense se verkiesingskonferensie by te woon. Breakfast het aan The Citizen gesê daar is geen rede waarom Ndlozi in die party moet bly nie. Hy sê van die EFF se probleme kan toegeskryf word aan Malema se leierskapstyl en voeg by die party is op hierdie stadium besig om in te plof.

# Cosatu in Noordwes vra die regering om weer te kyk na die land se mynboubeleid want produkte deur sogenaamde onwettige mynwerkers vind hulle weg na die mark hoewel dit goedkoop by hulle verkry word. Kopano Konopi van Cosatu sê die regering behoort die uitreik van mynlisensies aan kleinskaalse myners en koöperasies te ondersoek. Hy sê dit sal geleenthede bied vir oud-mynwerkers en inwoners van myngemeenskappe, en uitbuiting verminder deur diegene wat by hulle koop:

# Amerika se president Joe Biden het volgens berigte toestemming gegee dat Oekraïne die eerste keer Amerikaanse langafstandmissiele bekend as Army Tactical Missile Systems vir aanvalle in Rusland mag gebruik. Die missiele mag net in die Kursk-streek gebruik word waar Moskou byna 50-duisend soldate ontplooi het. Rusland het die naweek sy grootste gekoördineerde aanval in maande in Oekraïne uitgevoer en minstens tien mense is dood. Die Russiese president, Vladimir Putin, het die Weste in September gewaarsku sy land kan kernwapens gebruik as hy met konvensionele missiele aangeval word.

# Tennis: Die wêreld se nommer een, Jannik Sinner, het ʼn skitterende seisoen afgesluit met die prestasie dat hy die eerste Italianer is wat die ATP-jaareindtoernooi wen. Die 23-jarige Sinner het die Amerikaner, Taylor Fritz, in Turyn geklop. Ná sy 70ste oorwinning van die seisoen, het Sinner by Roger Federer en Novak Djokovic aangesluit as die enigste mans wat in een seisoen die Australiese Ope, Amerikaanse Ope en die ATP-jaareindtoernooi kon wen. Sinner sê hy was self verras met sy gelykmatige spel in hierdie seisoen:

# En die finansiële aanwysers: Die rand verhandel teen 18-rand-12-sent teen die dollar, 19-rand-11-sent teen die euro en 22-rand-90-sent teen die pond. Bitcoin verhandel teen 90-duisend-385-dollar-89-sent. Die prys van goud is twee-duisend-589-dollar-16-sent per fynons en die prys van Brent ruolie 71-dollar-42-sent per vat.

Bly ingeskakel vir meer nuus……………….