Nuus 08:00

BULLETIN 8 Julie 8 vm

Goeiemôre. Ek is……..

In die bulletin:

# Eskom gaan ‘n jaarlikse verlies van 15-miljard-rand toon
# Frankryk gaan ’n Parlement sonder ’n volstrekte meerderheid kry
# En krieket: Die tweede vroue-T20 tussen Suid-Afrika en Indië het uitgereën

# Eskom se uitvoerende hoof, Dan Marokane, sê ‘n einde aan beurtkrag sal beteken dat die kragverskaffer volgende jaar ŉ wins kan toon. Eskom staar volgens berigte ŉ jaarlikse verlies van 15-miljard-rand in die gesig, wat grootliks toegeskryf word aan dieselaankope van 33-miljard-rand. Die kragverskaffer het 100 dae sonder beurtkrag gehad weens sy multidimensionele opwekkingsherstelplan. Marokane sê hulle gebruik minder diesel en indien hulle dit kan volhou, sal daar vanjaar ŉ aansienlike finansiële verbetering wees.

# Die DA eis dat Energie-minister, Kgosientsho Ramokgopa, onmiddellik die ministeriële bepaling om nuwe kernkrag te bekom, hersien. Volgens berigte beplan die ministerie om binnekort goedkeuring te kry vir befondsing om ŉ kernkrag-aanleg van twee-duisend-500 megawatt te bou. Die voorgestelde aanleg sal groter wees as die Koeberg-aanleg noord van Kaapstad. ŉ DA-woordvoerder, Kevin Mileham, sê die minister moet die regte stappe doen om die nie-nakoming van kernkrag-aankope reg te stel:

# Die Portugese Forum is bekommerd oor die toename in ontvoerings van Portugese sake-eienaars vir ‘n losprys. Die polisie het verlede week twee sake-eienaars in Johannesburg gered. Vyf beweerde ontvoerders is aangehou na die vrylating van die tweede sakeman uit die Nancefield-hostel. Die voorsitter van die forum, Manny Ferreirinha, het aan die SABC gesê die voorvalle traumatiseer die slagoffers en hulle families. Hy vra die ontvoerings moet end kry:

# Peilings toon Frankryk se linksgesinde alliansie, New Popular Front, is op pad na oorwinning in die tweede ronde van die blitsverkiesing. Dit beteken die land kan moontlik ŉ parlement kry waar geen party ŉ volstrekte meerderheid het nie. Die New Popular Front het 182 setels gewen, terwyl president Emmanuel Macron se sentrale Ensemble-alliansie 163 setels gekry het. Die vêrregse National Rally, wat in die eerste ronde ŉ sterk voorsprong gehad het, het 143 setels. Eerste minister Gabriel Attal sê hy sal bedank as kiesers die vooruitsig van ŉ vêrlinkse of vêrregse regering verwerp.

# Krieket: Die tweede van drie Vroue-T20-wedstryde tussen Suid-Afrika en Indië in Chennai is halfpad weens reën gestaak. Tazmin Brits het haar tweede agtereenvolgende vyftigtal behaal en bygedra tot Suid-Afrika se 177 vir ses in hulle 20 boulbeurte. Reën het Indië se beurt vertraag en die wedstryd is uiteindelik gestaak. Die besoekers is steeds een-nul voor in die reeks nadat hulle die eerste wedstryd met 12 lopies gewen het. Die derde en laaste kragmeting vind môre op dieselfde veld plaas.

# En die finansiële aanwysers: Die rand verhandel teen 18-rand-17-sent teen die dollar, 19-rand-69-sent teen die euro en 23-rand-29-sent teen die pond. Bitcoin verhandel teen 54-duisend-998-dollar-3-sent. Die prys van goud is twee-duisend-383-dollar-18-sent per fynons en die prys van Brent ruolie 86-dollar-31-sent per vat.

Bly ingeskakel vir meer nuus……………….