Nuus 08:00

BULLETIN 12 Oktober 8 vm

Goeiemôre. Ek is……..

In die bulletin:

# Die regering gaan die Konstitusionele Hof nader oor die asiel-uitspraak
# Binnelandse Sake ontwikkel ‘n biometriese aanlynplatform om asielaansoeke te bespoedig
# En ‘n boot het naby Djiboeti omgeslaan met 139 slagoffers insluitend kinders

# Die regering beplan om die Konstitusionele Hof te nader om hom meer tyd te gun vir die implementering van sy uitspraak, wat prosedurele struikelblokke vir asielaansoeke verwyder het. Die hof het sekere bepalings van die Wet op Vlugtelinge ongrondwetlik verklaar wat immigrasiebeamptes toegelaat het om ‘n asielsoeker te deporteer indien hulle sonder ‘n deurreisvisum in die land is. Die voorsitter van die Interministeriële Komitee oor Migrasie, minister Mmamoloko Kubayi, sê die regering mag dalk ook vra vir ‘n opskortingtydperk om die Departement van Binnelandse Sake tyd te gee om die nodige kapasiteit te ontwikkel om aan die vereistes te voldoen.

# Die minister van Binnelandse Sake, Leon Schreiber, sê sy departement ontwikkel ‘n biometriese aanlynplatform om asielaansoeke te bespoedig, identiteitsverifikasie te versterk en te verhoed dat aansoekers wie se aansoeke afgekeur is, herhaaldelik eise indien om hul verwydering te vertraag. Na verwagting sal die platform teen 10 November vanjaar in werking wees. Schreiber sê die hervormings sal voortbou op die departement se ervaring met die gebruik van tegnologie om ander administratiewe prosesse te verbeter, insluitend die stelsel vir elektroniese reismagtiging:

# Die Departement van Basiese Onderwys het aansoek gedoen om verlof tot appèl teen ‘n uitspraak van die Hooggeregshof in Limpopo wat 50 voormalige matriekleerders vrygespreek het van eksamenonreëlmatighede. Die voormalige leerders van Baphutheng Sekondêre Skool se 2024-matriekuitslae is teruggehou nadat ooreenkomste in hul antwoorde op Besigheidstudies-vraestel een en Ekonomie-vraestel twee as bewys van “groepkopiëring” beskou is. Die hof het bevind dat die provinsiale departement nie daarin geslaag het om te bewys dat die leerders eksamenonreëlmatighede gepleeg het nie. Die departement glo dat belangrike inligting nie tydens die uitspraak in ag geneem is nie.

# Die Verenigde Nasies se Internasionale Organisasie vir Migrasie sê minstens 139 mense, insluitend 15 kinders, het gesterf nadat ‘n boot met meer as 305 migrante aan boord aan die kus van Djiboeti in Oos-Afrika omgeslaan het. Die boot was van Djiboeti op pad na Jemen toe dit naby Guehere, noord van Obock, gesink het. Nog 84 mense word vermis, terwyl 82 dit oorleef het. Alexandre Coissac, hoof van die IOM se sending in Djiboeti, het die tragedie bestempel as ‘n duidelike wekroep oor die gevare wat migrante in die gesig staar wanneer hulle elders ‘n nuwe lewe soek.

# Sokker: Manchester City het Liverpool, wat met net tien man gespeel het, met 3-0 op Anfield geklop om sodoende hul voorsprong van drie punte boaan die Premierliga-punteleer te behou. Dit was City se eerste wedstryd sedert ‘n onafhanklike kommissie die klub skuldig bevind het op alle aanklagte wat verband hou met ernstige oortredings van die Premierliga se finansiële reëls. Die klub het teen die uitspraak geappelleer en ontken enige wangedrag. Doele deur Erling Haaland, Rayan Cherki en plaasvervanger Jeremy Doku het aan die span ‘n klinkende oorwinning besorg. City se afrigter, Enzo Maresca, het sy spelers gevra om hulle nie aan die kwessie te steur nie:

# En die finansiële aanwysers: Die rand verhandel teen 16-rand-49-sent teen die dollar, 18-rand-48-sent teen die euro en 21-rand-83-sent teen die pond. Bitcoin verhandel teen 83-duisend-560-dollar. Die prys van goud is vier-duisend-203-dollar-24-sent per fynons en die prys van Brent ruolie 105-dollar-34-sent per vat.

Bly ingeskakel vir meer nuus……………….