Nuus 07:00

BULLETIN 2 September 7 vm

Goeiemôre. Ek is……..

In die bulletin:

# Partye het tot Vrydag om benoemings vir ’n getuienisleier van die Ampsklagkomitee in te dien
# OUTA verwelkom Eskom se terugtrekking van die dreigement om Johannesburg se krag af te sny
# En swem: Tatjana Smith beskuldig Swem SA dat hy prysgeld terughou

# Die voorsitter van die parlementêre Ampsklagkomitee, Makashule Gana, het politieke partye tot Vrydag kans gegee om nog benoemings vir ‘n getuienisleier in te dien. Die komitee het sy besluit herroep om advokaat Thandazani Madonsela aan te stel as getuienisleier van sy ondersoek teen president Cyril Ramaphosa oor die Phala Phala-sage. Ramaphosa het beswaar gemaak teen die aanstelling en moontlike botsing van belange aangevoer, insluitend dat hy voorheen regsadvies oor die ampsklagproses aan die ANC gegee het. Gana sê die komitee sal volgende Woensdag die benoemings oorweeg:

# Die minister van Indiensneming en Arbeid, Nomakhosazana Meth, sê die nasionale minimumloon bly noodsaaklike beskerming vir sektore waar oorheersend vroue werk: huiswerk, landbou, gasvryheid en kleinhandel. Die nasionale minimumloon is 30-rand-23-sent per normale werksuur. Meth sê dis kommerwekkend dat ʼn aansienlike deel van ekonomies aktiewe vroue in Suid-Afrika in die informele sektor werk wat grootliks buite bereik val van die Werkloosheidsversekeringsfonds en ander beskermingsmaatreëls wat die departement bied. Die minimumloon-kommissie het die publiek onlangs uitgenooi om kommentaar te lewer op die 2027-aanpassing.

# Die Organisasie teen Belastingmisbruik het Eskom se besluit verwelkom om nie langer elektrisiteit na dele van Johannesburg af te sny nie, nadat die stad vyf-miljard-rand se agterstallige skuld vereffen het. OUTA sê die onmiddellike bedreiging van kragonderbrekings is verwyder, maar vrae bly voortbestaan oor hoe die skuld betaal is en of die oplossing sal voortduur. Julius Kleynhans van die organisasie doen ‘n beroep op beter finansiële bestuur en sterker toesig om te verhoed dat Johannesburg in nog ‘n skuldkrisis oor elektrisiteit beland.

# Die Beaufort-Wes Munisipaliteit in die Wes-Kaap het vir die eerste keer in ses jaar ‘n befondsde begroting aanvaar, wat vordering in sy finansiële herstel aandui. Die munisipaliteit is in 2022 onder finansiële ingryping geplaas nadat hy gesukkel het om sy rekeninge en personeel te betaal. Sedertdien het sy ouditresultate verbeter en gekwalifiseer vir skuldverligting op sy Eskom- en waterskuld, wat sowat 94-miljoen rand kan afskryf. Die befondsde begroting toon Beaufort-Wes is op pad na beter finansiële bestendigheid en verbeterde dienslewering.

# Kanada se eerste minister, Mark Carney, sê handelsgesprekke met Amerika kan hervat word wanneer Washington ernstig raak oor onderhandelings. President Donald Trump van Amerika het verlede week ʼn uitvoerende bevel onderteken wat Lake Ontario se naam na Lake America verander – ʼn stap wat die Kanadese verwerp. Die Trump-administrasie het tariewe van 50-persent op Kanadese produkte ingestel terwyl Kanada beplan om uit vergelding tariewe op Amerikaanse produkte te hef. Carney sê Washington soek tans ʼn “onmededingende” ooreenkoms vir belangrike bedrywe:

# Swem: Die Olimpiese kampioen, Tatjana Smith, het ʼn aanmaning aan Swem Suid-Afrika gerig en eis die betaling van rente op prysgeld wat na bewering al meer as ʼn jaar lank teruggehou word. Sy beweer Swem Suid-Afrika hou rente terug teen die huidige koers op 560-duisend-rand en 650-duisend-rand prysgeld wat sy by die 2023 Wêreld Watersport-kampioenskap in Japan verdien het. Smith het by die kampioenskappe goud en silwer in die 200- en 100-meter borsslag gewen. Hurter Spies Attorneys, wat Smith verteenwoordig, het SSA tien dae tyd gegee om te reageer.

# En die finansiële aanwysers: Die rand verhandel teen 16-rand-18-sent teen die dollar, 18-rand-73-sent teen die euro en 21-rand-84-sent teen die pond. Bitcoin verhandel teen 76-duisend-796-dollar. Die prys van goud is vier-duisend-298-dollar-27-sent per fynons en die prys van Brent-ruolie 98-dollar-39-sent per vat.

Bly ingeskakel vir meer nuus……………….