Nuus 07:00

BULLETIN 16 Augustus 7 vm

Goeiemôre. Ek is……..

In die bulletin:

# Donald Trump sê geen ooreenkoms is bereik tydens sy vergadering  met Putin nie
# Die ANC sê daar is geen spanning tussen Ramaphosa en Mbeki nie
# En rugby: Die Haaie ly hul vierde agtereenvolgende nederlaag in die Curriebeker-kompetisie

# President Donald Trump sê daar was vordering tydens sy vergadering met sy Russiese eweknie, Vladimir Putin, maar geen ooreenkoms is bereik nie. Die leiers het gister in Alaska vir meer as twee en ‘n half uur vergader. Trump sê hy is van plan om die Oekraïnse president Volodymyr Zelensky en ander Europese leiers, wat nie aan die vergadering deelgeneem het nie in te lig:

# Die ANC het ontken dat daar spanning bestaan tussen president Cyril Ramaphosa en oudpresident Thabo Mbeki. Dit volg op die besluit van Mbeki en sy stigting om aan die tweedaagse nasionale konvensie te onttrek. Groepe soos die Thabo Mbeki-stigting en die Desmond en Leah Tutu-stigting het ‘n lang lys kwessies gestel vir hul onttrekking, insluitend ‘n knap tydlyn, gebrek aan voorbereiding, en interne meningsverskille. Mahlengi Bhengu-Motsiri van die ANC sê Ramaphosa en Mbeki respekteer mekaar:

# Die Forum for South Africa versoek die regering om die storting van goedkoop Amerikaanse hoender- en varkprodukte in die plaaslike mark te stop. FOSA waarsku dat hierdie invoere plaaslike boere, fabrieke en werksgeleenthede bedreig en werkloosheid en armoede kan vererger. Tebogo Mashilompane van die forum dring daarop aan dat owerhede produkte wat gestort word verbied of beperk en die land se ekonomiese soewereiniteit beskerm:

# Die DA gaan vrae in die Parlement aan die minister van Verdediging en Militêre Veterane, Angie Motshekga, rig en aandring op ‘n volledige openbaarmaking van kostes, fondse wat ingesamel is, en die besteding op die SANW se weelderige gholfdag by Pinnacle Point in Mosselbaai op 19 September. Die party sê die aanbieding is om horende doof te wees oor veterane se mediese rekeninge wat nie betaal word nie en soldate wat vir hulle toelaes wag. Die DA dring aan op die verklaring van elke sent om bekommernis oor finansiële wanbestuur in die weermag aan te spreek.

# AfriForum sê die Stad Johannesburg se besluit om sy omstrede kringtelevisie-verordening te herroep, is ‘n groot oorwinning vir inwoners. Die verordening, wat in die Hooggeregshof in Johannesburg as ongrondwetlik verklaar is, sou kameras in openbare en privaat ruimtes reguleer. Die organisasie het metro’s gewaarsku om gemeenskapsveiligheidsnetwerke te respekteer. Jacques Broodryk van AfriForum sê die uitspraak verseker dat veiligheidsinfrastruktuur onder die beheer van die gemeenskap bly:

# En rugby: Die Haaie het hul vierde agtereenvolgende nederlaag in die Curriebeker-seisoen gely toe die Griekwas die Durbaniete met 26–17 in Kimberley geklop het. Die tuisspan het vier drieë teenoor die besoekers se twee gedruk en sodoende ‘n bonuspunt en hul derde oorwinning in die kompetisie verseker. Dissipline het die Haaie se ondergang beteken, met Nick Hatton, Matt Romao en Jean Smith wat geel kaarte gekry het, en Griekwas die momentum gegee het. Vandag sal die voorloper op die punteleer, die Pumas, die Leeus in Mbombela verwelkom, terwyl die Cheetahs, tans in die tweede plek, teen die Westelike Provinsie in Bloemfontein sal uitdraf.

Bly ingeskakel vir meer nuus……………….